Турте за прво запче - традиционален семеен рецепт • Сè за храна

„Среќна сум што ќе ја збогатам ризницата од рецепти на sezahrana.mk со традиционален семеен рецепт, каков што досега немавме!“ – со радост вели Катерина од нашиот тим. Нејзиниот син беше инспирација за таа да ни го приготви и сподели превкусното и многу лично турте за прво запче. Се надеваме дека многу мајки ќе го испробаат и ќе уживаат во подготовката, а со тоа ќе придонесат во негување и зачувување на богатите традиционални вредности на нашата земја.

Еве што друго ни раскажа Катерина за рецептов: „Новата година ни започна со убава вест во домот, Димитар има запче, ми кажа сопругот! Утрински ни светна како бело бисерче! Па направив турте, да ги почестиме блиските како што е обичај. Да биде модерно е супер, но во класиката нема простор за грешка! Едноставно е проверено и одобрено од сите. Затоа се инспирирав да изберам испробан и веќе одобрен рецепт со генерации, од тефтерот на свекрва ми, стар повеќе од 30 години. Побрзав да направам и фотосесија од оваа убавина, затоа што обичај е да се подели со блиски луѓе. Подолу ќе ви споделам кои беа ,,предизвиците” да се подготви рецепт само од листа на состојки (затоа што запнав во доцните вечерни часови) и како ги надминав, за вие да немате никаков проблем при подготовката. Ништо сложено, само следете ги насоките и ќе ви излезе без грешка.“

Состојки:

1 чаша млеко
1 чаша Брилијант масло
2 јајца
рендана кора од 1 лимон
1½ чаша шеќер
1 лажиче сода бикарбона од Витаминка
1 ќесичка прашок за печиво од Витаминка
1 ќесичка ванилин шеќер од Витаминка
1 кг брашно.

Подготовка:

Во поголем сад за месење, изматете ги со виљушка прво јајцата, а потоа додајте ги млекото и Брилијант маслото. Кората од лимонот измијте ја и изрендајте ја, а по желба пред да ја рендате, оставете го лимонот да отстои најмалку 30 минути во 200 мл вода со 1 лажиче сода бикарбона. Потоа, додајте ја во садот со течните состојки.
Во друг сад, измешајте ги брашното со содата бикарбона, прашокот за печиво, шеќерот и ванилиниот шеќер. Потоа, во садот со сувите состојки постепено додавајте ја смесата со јајцата и мешајте.
Почнете да мешате со лажица додека се оформи топче од тесто, а потоа со раце, месете го тестото 10 минути или повеќе, за убаво да се соедини.
Рерната загрејте ја на 180 степени.
Во меѓувреме, тавата (или калап 24 см) намрсете ја со масло. Не е грешка ако го печете во поголема тава или калап, само да знаете дека ќе варира висината на туртето и соодветно ќе мора да се намали времето за печење ако е во поголема тава, а пониско. Ова е важна насока од подготовката, затоа што ако не го запазете добро печењето, може да не се допече убаво внатрешноста и средината да остане повлажна од краевите.
Измесеното тесто за турте, ставете го во тавата и декорирајте го по желба. Најлесно и традиционално декорирање на кое се сеќаваме, е со шарени чоколадни бонбони.
Така припременото турте, ставете го во загреаната рерна и намалете ја температурата на 160 степени.
Печете 45 минути до 1 час, зависно од рерната. Проверете со дрвена чепкалка дали внатрешноста е печена и туртето е спремно. Уживајте во светот на вкусовите, ви посакуваме здрави, силни и бели запчиња на вашите најмили!

„Чест ми е кога ве инспирирам, па за многу повеќе рецепти и убави фотографии следете ме на моите профили Катерина Шамбевска Спасеновска на Instagram или Facebook. А, ако го направите рецептов, пишувајте ми или означете ме и со задоволство ќе ве споделам на Story на моите профили!“ – вели Катерина.