Цигара бурек со месо и сирење • Сè за храна

Вистинско гурманско уживање за сите сладокусци кои обожаваат бурек, домашни пити и печива! Дали сте пробале цигара бурек? Последните месеци е хит на интернет во групите за готвење, а тоа ни беше мотивација да го приготвиме и испробаме овој рецепт. Ретко кој може да одолее на крцкав бурек со богат фил од месо или сирење. Набавете кори и свежо мелено месо, па направете го популарниот турски специјалитет познат како цигара бурек.

Се прави лесно, па иако е еден вид бурек, не ви се потребни никакви мајсторски вештини за да го направите. Лесно ќе се снајдат и новите, неискусни домаќинки. Пробајте и уверете се.

Состојки:

500 г триаголни кори
300 г мелено месо од Агриа
300 г сирење
2 јајца
150 мл кисела вода
100 мл масло
1 главица кромид
копар по желба
масло по потреба
сол и црн пипер по вкус.

Подготовка:

Најпрво подгответе го филот со месо. Кормидот исчистете го од лушпата и исечкајте го на ситни коцки. Во тава на загреано масло запржете го ситно сечканиот кромид, а потоа додајте го меленото месо, посолете и зачинете со копар и црн пипер. Готовиот фил префрлете го во длабок сад, додајте 1 јајце и добро измешајте.
Потоа подгответе го и филот со сирење. Во друг длабок сад на крупната страна од рендето изрендајте го сирењето, додајте 1 јајце и копар по желба. Добро измешајте да се изедначи смесата.
За подготовка најдобро е да користите триаголни кори. Но, доколку не може да најдете, бурекот може да го направите и со правоаголни кори за пита. Во овој случај кората попрскајте ја со мешавина од кисела вода и масло. Кората превиткајте ја на половина, така што ќе добиете триаголник, а потоа превиткајте ја уште еднаш за да добиете уште помал триаголник. Ако користите триаголни кори, овој чекор прескокнете го.
Секоја кора попрскајте ја со мешавината од масло и вода. На пошироката страна од триаголникот нанесете од сместа со сирење, свиткајте ги краевите со цел да не истече полнењето при пржење и завиткајте ја кората во ролна. Истата постапка повторете ја со сите кори, така што во половина ќе ставите фил со месо, а во останатите од смесата со сирење.
Вака подготвените бурек ролнички пржете ги во претходно загреано масло додека поруменат. Пржените ролнички редете ги во чинија обложена со кујнска хартија за да се впие вишокот на масло.
Послужете ги додека се топли со чаша јогурт или кисело млеко. На здравје!

Совети плус:

Цигара бурекот може да го приготвите и со печење. Ролничките ставете ги во плех обложен со хартија за печење. Печете ги во загреана рерна на 200 степени додека поруменат.
По желба, пред пржењето или печењето, ролничките може да ги похувате во смеса со јајце, брашно и лебни трошки.
За подготовка на бурекот може да користите свинско, јунешко или мешано мелено месо. Сакате да бидете сигурни дека ќе изберете квалитетно месо? – Ви препорачуваме да ги посетите месарниците на Агриа ширум земјата. Во нивните месарници во Велес, Битола и Штип ќе пронајдете свежо свинско и јунешко месо од домашно производство. Месото е со врвен македонски квалитет, кој се должи на принципот од „нива до трпеза“. Од Агриа имаат свои фарми, кланица и фабрика за производство на сточна храна која доаѓа од македонските полиња. Пробајте го свежото месо до Агриа и ве уверуваме дека нема да згрешите! Свежото свинско месо од Агриа може да го најдете и во Тинекс и Рамстор маркетите.