Мирис и вкус кој потсетува на топол дом и вкусен кремаст колач! Неодоливата комбинација на јаболка и цимет овој пат ја преточивме во лесен и брз рецепт за сладок десерт. Нема потреба од матење со миксер и само за неколку минути може да направите брза пита со јаболка и цимет.
Во потрага сте по интересен рецепт со јаболка? – На вистинското место сте. Децата ќе го обожаваат, а и возрасните исто така. Кремастата структура и совршената арома на јаболка и цимет која потсетува на пудинг ќе ве маѓепсаат уште на првата лажичка. Пробајте и уверете се!
Состојки:
- 3 јаболка
- ½ до 1 чаша шеќер
- 1 чаша млеко
- 1 чаша брашно
- ½ чаша растопен путер
- 1 јајце
- 1 лажичка цимет
- 1 ќесичка ванилин шеќер
- 2 лажички прашок за печиво
- ¼ лажичка сол
- шеќер во прав или листови бадеми за декорација по желба.
Подготовка:
- Во длабок сад ставете ги растопениот путер, брашното, прашокот за печиво, млекото, јајцето и солта, и добро измешајте ги со жица за матење.
- Во друг сад изрендајте ги јаболката и измешајте ги со шеќерот, ванилиниот шеќер и циметот. Ако јаболката се благи, намалете ја количината на шеќер. Вака подготвените јаболка ставете ги во микробранова печка на средна температура околу 5 минути за да омекнат. Јаболката можете и да ги динстувате во сад на оган. Оставете ги кратко да се изладат, а потоа изблендирајте ги со бленедер и додајте ги во смесата со млеко и брашно. Убаво измешајте за да се изедначат сите состојки.
- Подготвената смеса ставете ја во сад за печење (големина 24) или во повеќе помали садови. По желба декорирајте ја со листови бадеми.
- Печете во претходно загреана рерна на 200 степени околу 30 минути или додека порумени.
- Готовата крем пита од јаболка послужете ја со шеќер во прав или топка сладолед од ванила и препуштете му се на уживањето. На здравје!
Совет плус:
- Питата има кремаста структура која потсетува на пудинг. Најдобро е да ја испечете во повеќе мали садови и да ја послужите во нив.
Ви препорачуваме да прочитате: Крем пита со пудинг.