Имаме нов рецепт за мек и сочен чоколаден колач со круши кој се приготвува брзо и од состојки кои најверојатно ги имате во кујната! – А што е најважно, овој колач може да го направи секој, без разлика на кулинарското искуство.
Највкусните круши ги има во есен, нели е така? Време е да ги искористиме и да ги направиме најсочните десерти. Убавото кај овој рецепт е тоа што може да го приготвите и со круши кои малку ја изгубиле сочноста и свежината, или почнале да се расипуваат. Плус тоа, ако обожавате десерти со јаболка, направете мала измена и слободно додајте го омиленото овошје во рецептов. Како и да е, гарантираме дека ќе ви се допадне!

Состојки:
- 250 г брашно
- 200 г шеќер
- 1 лажица какао
- 1 ванилин шеќер
- 1 прашок за печиво
- 150 мл масло
- 150 мл вода
- 4 јајца
- 3-4 круши
- ½ лажичка цимет
За глазура:
- 1 чоколадо за готвење
- 3 лажици масло.
Подготовка:
- Во сад за матење, измешајте ги брашното, шеќерот, прашокот за печиво, маслото, ванилиниот шеќер, водата, циметот и какаото.
- Јајцата изматете ги во друг сад и додајте ги во преостанатите состојки. Изматете со миксер додека се добие хомогена смеса.
- Калапот за печење премачкајте го со растопен путер или обложете го со хартија за печење. Во претходно обложениот калап ставете ја смесата за колачот.
- Крушите излупете ги, исечете ги на парчиња и наредете ги врз колачот. По желба, пред да ги наредите, може да ги потопите во смеса од ванилин шеќер и цимет.
- Вака подготвениот колач печете го во претходно загреана рерна на 180 степени, околу 30-40 минути. За да проверите дали колачот е печен може да се послужите со дрвена чепкалка. Само боцнете ја во тестото и доколку чепкалката излезе сува, колачот е готов. Печениот колач оставете го да се излади.
- Чоколадото стопете го на пареа. Во растопеното чоколадо додајте го маслото и измешајте, па прелијте го колачот. На здравје!
Ви препорачуваме да прочитате: Посен колач со банани и мед.
