Нашите коски се најсилни во текот на младоста. Промените во исхраната и процесот на стареење, може да влијаат на здравјето на човековиот костур (скелет) и да го нарушат балансот помеѓу градењето на коските и нивното кршење.
Недостатокот на калциум и витамин Д, пушењето, недоволната физичката активност и промените на хормоните кои се појавуваат со процесот на стареење (менопауза кај жените) може да влијаат на недостаток на минерали во коските. За да се подобри состојбата на коските, еден од најдобрите начини е со помош на исхраната, односно со консумирање на одредена храна која може да ја подобри коскената густина на било која возраст.
Млечните производи се богати со калциум
Калциумот е најзначаен минерал за силни коски. Препорачаните дневни потреби на организмот се 1000 мг на ден, а по педесеттата година кај жените, оваа количина се зголемува до 1200 мг. Најдобар извор на калциум се јогуртот, киселото млеко, сирењето и млекото. Една чаша млеко во просек содржи 300 мг калциум. Доколку не можете да пиете млеко, не очајувајте, затоа што 250 мл кисело млеко содржи 415 мг калциум. Покрај тоа, може да изедете 45 грама полномасно сирење кое содржи приближно количество на калциум.
Консумирајте сардини за силни коски
Млекото и млечните производи не се единствените извори на калциум. Друг одличен извор се сардините. За силни и здрави коски изберете ги најмалите и коскести сардини кои помагаат да се изгради коскената маса во телото. Во една просечна конзерва со сардини од 85 грама има 325 милиграми калциум.
Вклучете го зелениот лиснат зеленчук во вашето мени
Можеби сте изненадени од фактот дека одредени видови на зеленчук содржат калциум во изобилство. Ова е случај со зелените лиснати зеленчуци, како што се кинеската зелка, кељ, спанаќ, брокула и блитва.
Јаткастите плодови и семките се богати со омега-3 масни киселини
Јаткастите плодови и семките може да допринесат во подобрувањето на здравјето на коските. Оревите и лененото семе се богат извор на омега-3 масни киселини. Кикиритки и бадемите содржат калиум, кој го намалува губењето на калциум. Јаткастите плодови содржат протеини и други хранливи материи кои помагаат во градењето на силни коски.
Ограничете го внесувањето на сол
Солта е главна причина за намалување на нивото на калциум во телото. Колку повеќе сол се внесува во организмот, толку повеќе се губи калциумот. Внесувањето храна што не содржи големи количини на сол може да помогне калциумот подолго да се задржи во телото.
Редовните прошетки во природа ќе ги зајакнат вашите коски
Како „одговор” на сончевата светлина, нашите тела произведуваат витамин Д. Без овој витамин организмот нема да биде во можност правилно да го апсорбира калциумот од храната која ја консумираме. Затоа искористете ги сончевите денови и направете прошетка во природа, која освен што ќе ве релаксира, ќе ги зајакне и вашите коски.