Доколку сте во потрга по вкусни и посни визитарски колачи за претстојните празници вие сте на вистинското место. Благодарение на Лана, споделуваме уште еден прекрасен рецепт за корнети со фил од костени кои ќе бидат вистинско слатко освежување на празничната трпеза.
Вкусни, мали и слатки, така би ги опишале овие чоколадни корнети кои се исполнети со превкусен крем од костени и слатка павлака. Всушност, овој рецепт може да го направите и во посна и мрсна варијанта во зависност од тоа каква павлака ќе употребите. А, на овие колачиња сигурни сме дека најмногу ќе им се радуваат најмалите, бидејќи неодоливо потсетуваат на мини сладолетчиња.
Состојки:
- 200 г посно чоколадо за готвење
- 200 мл посна слатка павлака
- 200 г пире од костени
- 1 лажица рум
- чоколадни трошки за декорација.
Подготовка:
- Најпрво подгответе ги чоколадните корнети. На хартија за печење нацртајте 10 кругови со пречник од 6-7 см и исечете ги. Од нив обликувајте мали цилиндри, а краевите залепете ги со помош на лепило.
- Чоколадото растопете го на пареа и со помош на четка внимателно нанесете го на внатрешниот дел на хартиените корнети.
- Премачканите хартиени корнети наредете ги на чинија, а потоа ставете ги во фрижидер за да се стегне чоколадото.
- На крај, внимателно одлепете го лепилото и одвиткајте ја хартијата од чоколадото. На овој начин ќе добиете мали чоколадни корнети кои може да ги наполните со фил по ваша желба.
- Потоа подгответе го кремот со кој ќе ги наполните корнетите.
- Во длабок сад изматете ја слатката павлака. Додајте го пирето од костени и 1 лажица рум, па добро изматете уште еднаш.
- Со вака подготвениот фил наполнете го шприцот за украсување со ѕвездест врв и наполнете ги корнетите од чоколадо.
- На крај, корнетите украсете ги со чоколадни трошки, а по желба може да ги декорирате и со растопено млечно чоколадо. На здравје!
Ви препорачуваме да прочитате: Чоколадно пире од костени.