Овесна тортиља со фил од печурки 1

Овесна тортиља со фил од печурки

„Превкусна е и едноставна! Здрава и безглутенска закуска за уживање! Ја подготвив со љубов во мојата кујна, а бидејќи сите дома бевме презадоволни од вкусната овесна тортиља со фил од печурки, се знае, морав да ја споделам со вас!“ – споделува Катерина од нашиот тим со сите нас.

„Во составот на тортиљата има овесно брашно. Можам да го опишам како „повлажно“ и малку е поинакво за подготовка, но ако добро ги следите насоките во рецептот нема да наидете на потешкотии. Дозата на состојките е за една тортиља, а вие зголемувајте ја по потреба соодветно.“ – додава Катерина.

Овесна тортиља со фил од печурки 2

Состојки:

  • 5 рамни лажици овесно брашно
  • 80-90 мл минерална вода
  • прстофат хималајска сол
  • 8-10 шампињони
  • 1-2 лажички мајонез
  • 1/2 домат со средна големина
  • 4-5 ливчиња свеж босилек.

Подготовка:

  1. Прво измијте ги и исечкајте ги шампињоните, а потоа запржете ги во малку масло.
  2. Во подлабок сад ставете го овесното брашно, посолете со малку хималајска сол и измешајте го со минералната вода. Смесата прво ќе биде доста течна, а откако ќе ја оставите да стои 5 минути ќе се згусне, а тоа и ви е потребно за да може добро да се испечи.
  3. Тавата за палачинки пребришете ја со намаслена чиста крпа или кујнска хартија и откако ќе се загрее, во неа турете ја смесата со овесното брашно. Бидејќи не е течна како кога се подготвува од бело брашно, доколку има потреба со помош на лажица разнесете ја низ тавата и оформете ја во кружна форма. На средно тивок оган, оставете ја да се печи околу 5 минути, а потоа затресете ја тавата да проверите дали се одлепила долната површина на тортиљата. Ако е печена долната страна, превртете ја од другата страна и повторно оставете ја да се печи неколку минути. Не мора, но препорачливо е, да ја завртите уште еднаш од првата страна на која се печела, за добро да се изврие.
  4. Готовата тортиља сервирајте ја во чинија и премачкајте ја со мајонезот.
  5. Распоредете ги претходно запржените печурки.
  6. Доматот исечкајте го на коцки и исто така распоредете го.
  7. На крај додајте го измиениот и ситно исечкан босилек и завртете во ролна. На здравје!

Препорака од авторот:

Се надевам дека фотографијата која ви ја направив ја раскажува приказната која сакав да ја пренесам до вас за вкусен и здрав оброк!

Ако го пробате рецептот и сакате да ве споделам на моето стори, тагирајте ме или испратете ми порака. Чест ми е кога ве инспирирам, па за многу повеќе испробани рецепти и убави фотографии следете ме на моите профили Катерина Шамбевска Спасеновска на Instagram или Facebook.“ – вели Катерина. 

Автор на рецепт и фото: Катерина Шамбевска Спасеновска, @katerina.shambevska.

Ви препорачуваме да прочитате: Печен помфрит од компири и тиквички на лесен начин.

Следете ја sezahrana.mk и на Instagram и Pinterest.

Ви препорачуваме да прочитате: Мексиканско тако со домашни тортиљи.

Сподели: