Брза безглутенска проја со кашкавал • Сè за храна

,,Нешто традиционално од мојата кујна, но со нов шмек! Овој пат ви припремив супер брза и безглутенска проја со кашкавал и вкусот е одличен! Нема ниту малку бело брашно и изобилува со полн вкус кој ќе го запаметите!” – срдечно споделува Катерина Шамбевска Спасеновска од нашиот тим.

,,Богата со хранливи состојки за уживање на сите членови од семејството. Моите најблиски ја обожаваат, а како препорака од нашето искуство, кога јадете, препорачувам да си набавите и јогурт, така е совршено!” – додава Катерина Шамбевска Спасеновска, а за повеќе интересни рецепти од неа, погледнете го нејзиниот Инстаграм профил @katerina.shambevska.

Состојки:

200-250 грама свежа сечкана блитва
100 г кашкавал Кораб овчи премиум
300 г бело сирење
1 лажиче сол
4 јајца
1 чаша јогурт
50 г путер, претходно стопен и изладен
околу 1 -1.5 чаша пченкарно брашно (додавајте постепено)
1 ќесичка прашок за печиво.

Подготовка:

Исчистете ја блитвата и измијте ја, па исечкајте ја поситно.
Кашкавалот и сирењето изрендајте ги.
Тава со големина бр 30. обложете ја со хартија за печење.
Јајцата добро изматете ги со вилушка.
Во садот со јајцата додајте ги јогуртот, путерот, солта и претходно припремените сирење, кашкавал и блитва. Промешајте со лажица.
Додајте ги пченкарното брашно и печивото, па убаво измешајте.
Смесата турете ја во претходно обложената тава со хартија за печење (со големина бр 30).
Печете во загреана рерна на 180 степени, за време од 25-30 минути или додека зарумени одозгора, а од рабовите се одлепува. На здравје!

Совети плус:

Блитвата можете да ја замените со спанаќ или зелје, зависно од сезоната.
Може да додадете или ставите само изварка или да ја направите само со сирење.
По желба, јајцата може да ги изматите и со миксер, додека се познава убава трага од маталките.