Печено сирење со рузмарин и лук • Сè за храна

Ако сакате да го изненадите семејството со нов рецепт, имаме одличен предлог за вас! Со заслужена репутација на врвен производ, мекото бело сирење на Камембер е разноврсно сирење кое може да се јаде на различни начини. Овој рецепт за печено сирење со рузмарин и лук од познатиот готвач Џејми Оливер е одличен за вкусно и брзо мезе за вас и вашите пријатели.

Камембер (француски: camembert) е меко кравјо сирење со кадифена кора од бела мувла и нежен кремаст вкус. Потекнува од познатиот северен дел на Франција, Нормандија. Првпат е произведено од фармерката Мари Харел во 1791 година. Денес се произведува секаде во светот под исто име бидејќи не е заштитено, но доколку сретнете некогаш Camembert de Normandie тогаш сте наишле на вистинското. Консумирањето на Камембер има корисен ефект врз нервниот систем, мускулите, кожата и косата, метаболизмот. Можеби ова е тајната на убавината на Французинките и неверојатниот карактер на жителите на Франција?

Состојки:

250 г Камембер
1 чешне лук
неколку гранчиња свеж рузмарин
Брилијант маслиново помас масло
парчиња леб
1 мала лажичка морска сол од Витаминка
сува брусница
ореви.

Подготовка:

Вклучете ја рерната да загрева на 180ºС.
Сирењето оставете го во кутијата и направете вдлабнатина во средината. Чешнето лук исчистете го и исечкајте го. Ставете го во средината на сирењето и додајте малку свеж рузмарин.
Вака подготвеното сирење наросете го со малку Брилијант маслиново помас масло, а потоа ставете го во загреана рерна да се печи за време од 15 до 20 минути.
Лебот исечете го на коцки. Парчињата леб наредете ги на исчистени стапчиња рузмарин (како ражничи) и наросете ги со маслиново масло и морска сол. Наредете ги во тава и ставете ги да се печат заедно со сирењето.
Сувата брусница и оревите ситно исечкајте ги и ставете ги во посебен сад.
Откако ражничите од леб и сирењето ќе добијат златно-жолта боја извадете ги од рерната и послужете ги на даска. Секој залак од ражничите потопете го во сирењето, па во миксот од сечканата брусница и ореви. На здравје!