Чоколадо и портокал – тоа е нашата омилена комбинација и инспирација за подготовка на нови десерти! Овој пат ви приготвивме меки, сочни, вкусни посни чоколадни мафини со освежителна арома на портокал.
Подготовката на посните мафини е едноставна и брза. Накратко, во еден сад ги мешате сувите состојки, а во друг течните. На крај ги соединувате и смесата ја ставате во калапот за печење. Тоа е тоа! Потребни ви се околу 5 минути за подготовка и 30-тина минути за печење. А од наведените состојки ќе добиете 12 мафини.
Состојки:
- 200 грама брашно
- 180 грама шеќер
- 30 грама какао
- ¼ мала лажичка сода бикарбона
- 2/3 прашок за печиво
- 1 ќесичка ванилин шеќер
- ½ кора од портокал
- сок од ½ портокал
- ½ мала лажица киселина
- 70 мл масло
- 150-170 мл вода.
Подготовка:
- Во длабок сад се ставаат сувите состојки: брашното, шеќерот, какаото, содата, прашокот за печиво, ванилиниот шеќер и кората од портокал. Се мешаат за да се добие хомогена смеса.
- Сокот од портокал се става во мерен сад и во садот се дополнува со вода. Потребно е да се припремат 220 мл раствор од водата и сокот од портокал. Во мерниот сад се додаваат маслото и киселината. Растворот се меша.
- Во садот со брашното постепено се додава од растворот со водата. Смесата се меша за да се соединат состојките.
- Во калап за мафини се ставаат хартиени корпи. Доколку немате хартиени корпи, калапот можете да го намрсите и да го поросите со брашно. Сепак, подобро е да користите хартиени корпи за да може лесно да ги извадите мафините.
- Во секој отвор се ставаа од смесата до 2/3 од висината. Не ставајте повеќе од оваа висина, затоа што мафините ќе нараснат и може да се разлеат над калапот, а потоа ќе биде потешко да ги извадите.
- Вака приготвените мафини ставете ги да се печат во загреана рерна на 180 степени за време од 25 до 30 минути.
- Печените мафини оставете ги да се изладат за време од 15-тина минути, а потоа извадете ги. Сервирајте ги со шеќер во прав и послужете ги. На здравје!
Ви предлагаме да прочитате: Сочни мафини со цреши.