Совршена комбинација за богат прилог кој сигурно ќе му се допадне на целото семејство! Нам веќе е ни е еден од омилените рецепти, а посебно обожаваме да го правиме за време на празници и свечени фамилијарни собири. Пробајте го и вие нашиот вкусен прилог од запечени компири со домашен тартар прелив, ќе уживате неизмерно!
Ова е брз и лесен начин да имате вкусно јадење на трпезата. Комбинацијава е одлична и за мезење, па како и да се одлучите да ја пробате, воопшто нема да згрешите.
Состојки:
- 4-5 компири зависно од големината
- 100 гр ситно рендан кашкавал
- 3-4 лажички мешан зачин
- сол и мелен црн пипер по вкус
- малку масло по потреба.
За домашен тартар прелив:
- 1 лажица сечкан кромид
- 1 чашамајонез
- 1 лажица рендани корнишони (кисели краставички)
- 2 лажици свеж сок од лимон
- сол по вкус
- мелен црн пипер по вкус.
Подготовка:
- Прво подгответе го домашниот тартар прелив.
- Во длабок сад ставете ги ситно сечканиот кромид, изренданите кисели краставички, мајонезот и свежо цедениот сок од лимон.
- Зачинете со сол и црн пипер.
- Измешајте убаво, а потоа готовиот тартар прелив покријте го со најлонска фолија и оставете го да стои во фрижидер најмалку еден час пред служење.
- Компирите прво измијте ги, па по желба излупете ги и исечете ги на половини или четвртинки, зависно од големината. Најдобро да ја прилагодите големината колку просечен залак.
- Така припремените компири зачинете ги прво со малку масло, па наросете ги сол и црн пипер по вкус.
- Рерната загрејте ја на 230 степени.
- Во меѓувреме, припремете ја тавата за печење, така што ќе ја обложите со хартија.
- Во неа ставете ги претходно зачинетите компири и поросете ги со ренданиот кашкавал.
- Кога ќе ги ставите компирите во рерната, температурата намалете ја на 180 степени и печете 30-35 минути (времето може да варира зависно од температурата на рерната, големината и количината на компирите).
- Оставете малку да се изладат и сервирајте ги во чинија.
- На крај, потурете ги со домашно припремениот тартар прелив и на трпезата ќе имате незаменливо вкусно уживање. На здравје!
Ви препорачуваме да прочитате: Домашна Пеперони пица.