Избегајте од секојдневието и внесете креативност во јадењето! Тостирањето го овозможува тоа. Брановидниот изглед, крцкавата кора, неодоливиот мирис и сочност… Сето тоа ги прави овие тостирани лепчиња со сос идеална идеја за појадок и совршена можност за промена на менито!
По желба можете да изберете интегрален, бел или каков и да посакате леб, а комбинацијата на состојки ќе му даде одличен вкус. Со мерак одгледуваме босилек и често е инспирација за разни убави рецепти, па така настана и овој. Задоволни од вкусот, сакавме она што е добро да го споделиме со сите вас. Пробајте, нема да се каете!
Може да ве интересира: Зошто босилекот треба да биде вклучен во секојдневната исхрана?
Состојки:
*за два тоста
- 4 лепчиња
- 2 кришки кашкавал
- малку чадено месо, врат, чајна, пршута, шункова салама, по желба
За сос:
- 1/2 павлака
- 5-6 ливчиња босилек
- 1 или 1/2 чешне лук по вкус.
Подготовка:
- Во сад ставете ја павлаката, ситно сечканиот босилек и со алатка иситнетиот или многу ситно исечкан лук. Измешајте.
- Со сосот премачкајте ја прво внатрешната страна на лепчето, па ставете кришка кашкавал и од чаденото месо по ваш избор.
- Поклопете со другото лепче и пред да го ставите да се печи на претходно загреаниот тостер, премачкајте ја и надворешната страна со сосот. За неколку минути може да уживате во топлиот и крцкав тост, на здравје!
Ви препорачуваме да прочитате: Брзи тост лепчиња – гратинирани.