„Ладните денови се како измислени за нешто совршено како што е штрудла од домашни кори, филувана со најдобра комбинација од јаболка, цимет и ореви. Мирисот кој се шири низ домот е неверојатно добар, а вкусот пак…, тој е приказна која мора да се доживее и навистина не можам да ви ја опишам освен да пробате.“ – вели Катерина од нашиот тим, а ние со задоволство споделуваме со сите вас!
Инспирацијата на Катерина да го направи овај старински рецепт потекнува од потесното семејство, како што ни кажа, и додава: „Се надевам дека ова срдечно споделување на вкусното доживување од мојата штрудла кај нас дома, ќе ве мотивира да ја пробате. Идејата ми дојде за време на новогодишните празници, а бев поттикната од еден пријатен разговор со баба ми, која ми раскажуваше дека на времето вака правеле штрудла. Проверив дали имам состојки и започнав, па кога се воодушевив од крајниот резултат и за вкус и на изглед, побрзав да направам фотки за да можам да ви ја доловам радоста и вас.“
Состојки:
За тесто:
- 500 г брашно (по потреба може да ви треба уште малку)
- 1/2 лажичка сол
- 80 мл масло
- 250 мл млака вода за замесување.
За фил:
- 500-600 грама нечистени јаболка
- 5-6 лажици шеќер
- 5-6 лажици гриз
- 1 ќесичка ванилин шеќер
- 1 лажица цимет од Рајска градина
- 50-60 грама сечкани ореви.
За попрскување на кори:
- масло по потреба.
Подготовка:
- Прво подгответе го филот. Јаболката измијте ги, излупете ги и исчистете ги, па изрендајте ги и ставете ги во поголем сад во кој ќе го припремате филот. Додајте ги шеќерот, ванилиниот шеќер, гризот, циметот и сечканите ореви. Промешајте и поклопете со капак или фолија.
- За тестото, во поголем сад за месење ставете ги брашното, солта, маслото и млаката вода за замесување. Замесете меко, но нелепливо тесто и поделете го на 3-4 дела.
- Од секој дел оформете топче, а потоа со помош на рацете притиснете го до дебелина од 1 см.
- Ставете ги во претходно намрсен плех, премачкајте ги со масло и одозгора, па покријте ги со најлонска фолија за да не фатат кора. Оставете ги 15 минути да одморат, па започнете со тегнење.
- Во меѓувреме на маса, постелете постар памучен чаршаф кој лесно се витка. Раширете едно од топчињата и полека истегнете голема тенка кора. Со помош на мал нож отстранете ги задебелувањата на краевите, а потоа попрскајте со масло и распоредете од претходно припремениот фил, оставајќи без фил, 15-тина см на еден од краевите за полесно да ја завиткате на крајот и убаво да личи.
- Потоа, со помош на рацете завиткајте неколку см од филуваниот крај на кората, за да почне да се оформува ролната, а потоа со помош на чаршафот довршете го виткањето.
- Постапката повторете ја со сите топчиња, а од остатоците кои ги сечевте од корите може да премесите уште едно топче, кое повторно треба да отстои барем 15-20 минути, но квалитетот на тестото нема да биде ист како на првите.
- Готовите ролни, редете ги во намрсен голем плех. Попрскајте ги со малку масло одозгора и печете во претходно загреана рерна на 210 степени, околу 30 минути, или додека добијат убава златно кафеава боја.
- Печената штрудла од домашни кори кратко покријте ја со платнена крпа. Оставете да се излади и на здравје!
За крај, сакаме да споделиме со вас неколку корисни информации за циметот. Скоро и да нема човек кој не сака цимет, особено ако е во добра комбинација со комплементарни состојки како јаболко и орев. Циметот сам од себе е здрав зачин, кој помага за силен имунитет, што е и тоа како корисно за ладните денови. Исто така, циметот ефикасно дејствува против згрутчување на крвта и затоа е одличен за подобрување на циркулацијата. Како и разни други зачини, циметот со задоволство го набавуваме од проверената палета на Рајска градина. Природен е и без ГМО, а достапен е во вид на ќесичка и тегличка, па препорачуваме да го пробате.
Може да ве интересира: Празнично варено вино со портокал и зачини.
Препорака од авторот:
Ако сте правеле мазник, подготовката на оваа штрудла од домашни кори нема да ви биде никаков проблем. А и да не сте правеле, обидете се, сигурна сум дека ако убаво ги следите моите инструкции ќе успеете без проблем. И секако, радо ви стојам на располагање да ме контактирате ако ви е потребна помош за изработката!
Ако ја направите и сакате да ве споделам на моето стори, тагирајте ме или испратете ми порака. Чест ми е кога ве инспирирам, па за многу повеќе рецепти и убави фотографии следете ме на моите профили Катерина Шамбевска Спасеновска на Instagram или Facebook.“ – вели Катерина.
Автор на рецепт и фото: Катерина Шамбевска Спасеновска, @katerina.shambevska.
Ви препорачуваме да прочитате: Есенска пита со јаболка и цимет – брза и без миксер.
Следете ја sezahrana.mk и на Instagram и Pinterest.
*Спонзориран рецепт.