Сите маркети изобилуваат со разни брендови за мајонез, а на сите нас посебно ни е интересно да пробаме од најомилениот „домашен бренд“ за кој знаеме што и како сме ставиле! Пробајте го нашиот рецепт за домашен мајонез кој ќе го направите за само неколку минути.
Клара сподели со нас нејзини спомени и ни кажа „Кога бев дете мајка ми често правеше мајонез. Се сеќавам само дека маслото го додаваше „капка по капка“ и дека матењето траеше долго. Со напредувањето на технологијата, денес еве и јас посакав еднаш да пробам свој рецепт за домашен мајонез, кој беше готов за помалку од 5 минути. Да живее блендерот!“
Освен финтата со блендерот, важно е да се користат свежи јајца, кои пред блендирањето мора да се стојат неколку часа на собна температура за успешна подготвка на мајонезот. Исто така, многу битен и изборот на маслото, бидејќи од неговиот квалитет во голема мера ќе зависи и вкусот на самиот мајонез. Внимавајте и каков сенф ќе користите и од него би требало да зависи колку полна или попразна ќе биде лажичката со сол, ако има поизразен вкус, додајте помала количина сол за да не ви излезе пресолен.
Состојки:
- 2 јајца
- 400 мл масло
- 1 лажиче шеќер
- 1 лажиче сол
- 1 лажиче киселина (било каква, или најдобро природен лимонов сок)
- 1 лажиче сенф.
Подготовка:
- Сите состојки се ставаат во стаклена тегла.
- Блендерот се става на дното од теглата каде што се почнува со блендирање. Веднаш, за кратко време веќе ќе го видите изгледот на мајонезот. Важно е да започнете од дното на теглата , па откако ќе згусти во тој дел, полека кревајте го блендерот на горе и постепено на горе, се додека не се спои цело масло во изглед на мајонез.
- На крајот може да го движите блендерот горе-долу (по потреба), а никако странично или кружно.
- Потоа се промешува со лажица, се проверува вкусот, па се затвора теглата и се чува во фрижидер. Рокот на траење е неколку дена, најкасно до една седмица.
Рецептот го испратил: Клара Бос.
Ви предлагаме да прочитате: Рецепт за домашен посен мајонез.