баклава

Баклава со лешници

Балкавата е ориентален десерт, кој е многу популарен во македонската, турската, српската, бугарската, босанската и црногорската кујна. Таа е многу сладок десерт, а основни состојки за подготовка на баклава се тенки кори, фил и шербет.

Филот за баклава најчесто се прави од мелени ореви, бадеми, ф’стаци лешници или суво грозје. Како зачини се користат рендана кора од лимон, цимет или ванилин шеќер. А ако и вие сте љубител на баклава ви предлагаме да го пробате рецептот за баклава со лешници кој ни го испрати Даниела.

баклава

Состојки:

  • 1 кг кори за баклава
  • 400 гр печени лешници
  • 400 гр шеќер
  • 8 лажици мелен двопек или лебни трошки.

За шербет:

  • 1 кг шеќер
  • 500 мл вода
  • сок од половина лимон
  • 2 ќесички ванилин шеќер.

За прелив:

  • 250 гр путер или маргарин
  • масло по потреба.

Подготовка:

  1. Најпрво се започнува со подготовка на шербетот. Во тенџере на оган ставете го шеќерот, водата, сокот од лимон и ванилиниот шеќер. Мешајте додека шербетот зоврие, а потоа тенџерето тргнете го од оган и оставете да се излади.
  2. Лешниците измелете ги и ставете ги во длабок сад. Во садот со лешници додајте ги шеќерот и мелениот двопек.
  3. Во тава за печење број 40, ставете три кори и попрскајте ги со масло. Потоа, секоја наредна кора премачкајте ја со масло со помош на готварска четка.
  4. Врз секоја втора кора ставете по 3 до 4 лажици од припремениот фил.  Постапката повторете ја со сите кори.
  5. Путерот ставете го во сад на оган и се растопете го. Со растопениот путер прелејте ја баклавата.
  6. Потоа, баклавата се сече на парчиња во саканата форма.
  7. Во загреена рерна на температура од 250 степени ја печеме баклавата 5 минути, а потоа температурата ја намалуваме на 200 степени и печеме 40 минути, додека не се добие убава крцкава кора.
  8. Откако баклавата ќе се испечи ја потураме со изладениот шербет. Вака припремената баклава со лешници оставете ја да се излади за време од неколку часа, а најдобро е преку ноќ.

Рецептот го испратил: Даниела Џогова

 

Сподели: