Сите обожаваат тестенини, па уште ако се домашни и со фил сигурни сме дека никој нема да има никаква забелешка. Иако, најчесто на сите ни е полесно да купиме готови тестенини, на страницата на нашата пријателка Лана најдовме супер рецепт за брзи домашни тортелини со сирење и спанаќ!
Кремасти, сочни вкусни. Така би ги опишале овие тортелини. Иако можеби ќе ви одземат малку подолго време за нивната подготовка за разлика од купечките тортелини, вкусот е неспоредливо подобар. Пробајте ги и уверете се.
Состојки:
За тесто:
- 300 г брашно
- 3 јајца
- вода по потреба
За фил:
- 150 г свежо сирење
- 100 г спанаќ
- 1 лажица павлака
- сол по вкус
За сервирање тортелини (за 3 порции):
- 300 г тортелини со сирење
- 300 мл млеко
- 100 г топено сирење (зденки)
- сол и црн пипер по вкус
- пармезан
- свеж магдонос или власец.
Подготовка:
- Од јајцата и брашното замесете цврсто тесто. По потреба може да додадете и малку ладна вода.
- Тестото завиткајте го во најлонска фолија и оставете го да одмори барем 1 час, а може и подолго.
- Потоа, тестото развлечете го во тенка кора и со назабен нож исечете го на квадратчиња со еднаква големина.
- Потоа, направете го филот. Во длабок сад додајте ги свежото сирење, сечканиот спанаќ и 1 лажица павлака. Добро промешајте за да се поврзат сите состојки.
- На секое квадратче тесто, нанесете по една лажичка од вака подготвениот фил.
- Потоа, секое квадратче преклопете го, така што ќе добиете триаголник, па обликувајте ги тортелините околу прстот.
- Вака подготвените тортелини варете ги во солена вода неколку минути и извадете ги со помош на решеткаста лажица веднаш штом ќе испливаат на површина.
- Откако ќе ги сварите тортелините, загрејте го млекото и во него додајте го топеното сирење. Може да комбинирате сирење со повеќе вкусови по ваша желба.
- Додајте сол и црн пипер по вкус. Мешајте додека сирењето се растопи во целост.
- Со вака подготвениот фил прелијте ги претходно сварените тортелини.
- Поросете ги со малку рендан пармезан и свеж магдонос или власец. Послужете ги додека се топли и на здравје!
Ви препорачуваме да прочитате: Тортелини во кремаст сос со печурки и ореви.