Крем питата е најубава кога е направена од домашни кори, нели? Но, истата може да се направи и со готови кори, а тоа го препорачуваме за оние кои се малку понеискусни во кујната. А за оние похрабрите кои имаат повеќе искуство во подготовка на колачи им нудиме домашен рецепт за крем пита.
Но, покрај одличните кори, она што всушност воодушевува во овој рецепт е богатиот и превкусен фил. Тој е направен од млеко и јајца и има прекрасна арома на ванила. Кремаст е и воздушест, а што е најважно кога ќе пресечете парче не се разлева и останува на место. Па, со право можеме да кажеме дека овој рецепт кој ни доаѓа од кујната на Лана е совршен.
Состојки:
За кори:
- 180 + 70 г брашно
- 1 жолчка
- 1 лажица масло
- 1 лажица киселина
- ½ лажица шеќер
- прстофат сол
- 125 г маст на собна температура
- 125 г путер или маргарин на собна температура
- малку вода
За фил:
- 10 јајца
- 1 л млеко
- 250 мл вода
- 500 г шеќер
- 3 ќесички ванилин шеќер
- 150 г брашно
- 100 г густин
Подготовка:
- Најпрво се прават корите. Во еден сад измешајте ги 180 г брашно, жолчката, маслото, киселината, шеќерот, солта со околу половина чаша вода. Од состојките замесете тесто. Тестото завиткајте го во фолија и оставете го да стои во фрижидер за време од 15 минути.
- Во друг сад измешајте 70 г брашно со маста и путерот. Добиената смеса поделете ја на три дела.
- Тестото развлечете го во правоаголна кора и премачкајте го со 1/3 од смесата од брашното и путерот. Превиткајте го на половина како книга и оставете го да стои во фрижидер околу 30 минути.
- Тестото повторно исучете го и премачкајте го со смесата од брашно и путер. Превиткајте го на половина како книга и оставете го да стои во фрижидер околу 30 минути.
- Постапката повторете ја уште еднаш. Најдобро е тестото за корите да се подготви еден ден порано, а наредниот ден да се печи.
- Изладеното тесто поделете го на два дела. Исучете кори во големина на плехот за печење. Плехот обложете го со хартија за печење и ставете ја првата кора од тестото. Тестото малку се собира во печењето, па може корите да развлечете до самите рабови на плехот.
- Кората боцнете ја со виљушка на неколку места. Плехот ставете го да пече во претходно загреана рерна на 200 степени за време од околу 15 минути.
- Испечената кора внимателно отстранете ја од плехот заедно со хартијата за печење и оставете ја да се излади.
- Од преостанатиот дел од тестото исучете уште една кора и ставете ја во плехот кој претходно сте гто обложиле со хартија за печење. Кората боцнете ја со виљушка на неколку места и ставете ја да се пече. Печената кора извадете ја од рерната и оставете ја да се излади. Поубавата кора исечете ја на коцки.
- Во сад измешајте го млекото со 200 г шеќер и ванилиниот шеќер. Садот ставете го на оган на умерена температура да се вари.
- Жолчките одвојте ги од белките во два посебни сада.
- Жолчките изматете ги со 200 г шеќер. Во добиената смеса додајте го густинот, брашното и 250 мл ладна вода. Добро измиксирајте додека добиете мазна и хомогена смеса без грутки.
- Во садот со млекото кое врие, додајте ја смесата со жолчките. Варете ги со постојано мешање додека добиете густ крем.
- Садот со кремот тргнете го од огнот и покријте ја со фолија. Кремот оставете го малку да се излади.
- Во меѓувреме изматете ги белките со 100 г шеќер во цврст шлаг.
- Шлагот од белки измешајте го со изладениот крем од жолчки и млеко.
- Правоаголниот калап обложете го со хартија за печење и врз неа ставете ја целата испечена кора. Може да користите и повисока тава за печење, а важно е филот да не се излее. Доколку краевите на кората се подолги од калапот слободно пресечете ги.
- Врз кората рамномерно нанесете го филот. Врз филот ставете ги исечените коцки од кората.
- Врз крем питата поросете шеќер во прав и чувајте ја на ладно место се до служење.
Напомена: Со оглед на тоа што филот за крем питата е направен од јајца и млеко, најдобро е истата да се консумира во рок од 2-3 дена.
Ви препорачуваме да прочитате: Крем пита со јагоди.