Еве уште еден здрав рецепт кој се приготвува лесно и едноставно. Од кујната на Невена ни доаѓа вкусно јадење за зачинети компири и грашок, приготвени со најздравите зачини како куркума, кари, магоднос и ким. Посно, вегетаријанско и не содржи глутен!
Куркумата може да се нарече чудо од природата, како резултат на антивоспалителните карактеристики. Поновите истражувања го потврдија благотворното дејство на куркумата кај лица заболени од рак и Алцхајмерова болест. Главната состојка на куркумата е куркуминот, кој е особено значаен во борбата против ракот.
Кимот претставува добар извор на железо, манган, како и други витамини и минерали. Некои истражувања покажуваат дека може да го стимулира производството на панкреасните ензими и да помогне во варењето на храната.
Состојки:
- 8 средни компири
- 300 гр замрзнат грашок
- 1 мала главица кромид
- 2 чешниња лук
- 2 лажички кари
- 1 лажичка куркума
- ½ мала лажичка ким
- 2-5 лажици маслиново масло
- 2-5 лажици сончогледово масло
- по вкус сол и мелен црн пипер
- 1-2 лажици ситно сечкан магдонос.
Подготовка:
- Компирите излупете ги и исечете ги на помали коцки. Во тенџере на оган, на висока температура ставете вода да зоврие. Во зовриената вода ставете сол и додајте ги компирите и грашокот да се варат, додека компирите омекнат.
- Варените компири и грашок исцедете ги од водата.
- Кромидот и лукот ситно исечкајте ги. Во тава на оган ставете ги маслата да се загреат. Во загреаното масло додајте ги ситно сечканиот кромид и лук и пропржете ги додека кромидот омекне.
- Во тавата со кромидот додајте ги кари зачинот, кимот и магдоносот, и измешајте.
- Потоа додајте ги варените компири, грашокот, куркумата, црниот пипер и мешајте додека убаво се изедначат. Пропржете ги минута до две, а потоа тргнете ја тавата.
- Топлите зачинети компири со грашок, послужете ги веднаш со салата по желба!
Рецептот го испратил: Невена Ѓеровска.
Ви предлагаме да прочитате: Печени гурмански компири.