Омилени, традиционални и превкусни! Направивме домашни индијанки со фил од пудинг! Обожаваме да креираме нови рецепти, а особено да ги преработуваме македонските традиционални јадења и десерти и да им дадеме наш „печат“. Така ја споивме традицијата и направивме нов рецепт за индијанки.
Што да ви кажеме повеќе, доволно е само да ја погледнете сликата. Но, сепак еве мал совет од нас. Од наведените состојки ќе добиете 13-15 индијанки, а бидете сигурни дека ниту една нема да остане.
Состојки:
- 4 јајца
- 120 грама шеќер
- 150 грама брашно
- 1 ќесичка прашок за печиво
- 1 ќесичка ванилин шеќер.
Фил:
- 300 мл вода
- 150 грама шеќер
- 1 ќесичка пудинг од ванила
- 1 јајце
- 4 лажици брашно
- 300 мл вода
- 125 грама путер или маргарин
- 50 грама шеќер во прав
- 1 лажица какао
Подготовка:
- Белките одвојте ги од жолчките и ставете ги во сад за матење. Во садот со белки, додајте го шеќерот. Матете ги со миксер за време од 5-7 минути додека добиете густ шлаг.
- Во друг сад за матење ставете ги жолчките и додајте го ванилиниот шеќер. Матете ги со миксер за време од 3-5 минути додека добиете густ крем.
- Брашното и прашокот за печиво измешајте ги со лажица.
- Во садот со изматените белки додајте ги жолчките и кратко измешајте ги со лажица. Потоа додајте го брашното со прашокот за печиво и повторно кратко измешајте со лажица за да се соединат состојките.
- Во тава обложена со хартија за печење со помош на готварски шприц или лажица ставете од смесата за индијанки. Обликувајте форми по ваша желба. Ние се одлучивме за кругови, а потребни ни беа две тави за печење.
- Индијанките ставете ги да се печат во загреана рерна на 200 – 220 степени. Печете ги за време од 5-7 минути, додека малку поруменат.
- Печените индијанки оставете ги да се изладат.
- Во тенџере на оган ставете 300 мл вода и 150 грама шеќер да се варат.
- Во меѓувреме, јајцето ставете го во сад за матење. Изметете го со миксер за време од 2-3 минути. Во садот со изматеното јајце додајте ги пудингот од ванила и брашното. Кратко измешајте и додајте 300 мл вода. Повторно измешајте.
- Во тенџерето со шербетот, додајте ја смесата со јајцето и пудингот. Варете за време од 3-5 минути додека се добие густ крем. Кремот оставете го да се излади.
- Путерот изматете го со шеќерот во прав и постепено додавајте го изладениот крем од ванила. Филот изматете го со миксер додека добиете хомогена смеса. Потоа, кремот поделете го на два дела. Во едниот дел додајте го какаото и измешајте со лажица.
- Земете едно колаче од печените индијанки. Едната половина, со помош на готварски шприц филувајте ја со кремот од ванила, а другата половина со филот од чоколадо. Врз филот ставете друго колаче од индијанките. Повторно филувајте со кремот од ванила и чоколадо. Постапката повторете ја додека ги потрошите сите колачиња.
- Вака приготвените индијанки со фил од пудинг чувајте ги во фрижидер и послужете ги со декорација по ваша желба. На здравје!
Ви предлагаме да прочитате: Велигденски куглоф со мармалад и суво овошје.