Наполеон колачи со лиснато тесто и јагоди

Веќе е сезона на јагодите, па еве еден убав предлог за пролетен десерт кој веруваме дека ќе ве освои. Вкусните наполеон колачи со лиснато тесто и јагоди се елегантни и супер сочни, па сигурно ќе ги импресионираат вашите пријатели и семејство. Слоеви лиснато тесто, вкусен ванила крем и свежи исечени јагоди, наросени со шеќер во прав е она што го прави овој десерт фантастичен!

Готовото замрзнато лиснато тесто е еден од најдобрите начини да се „покажете“ како добар готвач и домаќин, без да ви бидат потребни готвачки вештини. Исто така, јадењата со лиснато тесто се прават релативно брзо, се супер воздушести и меки. Затоа, ви предлагаме да го пробате овој рецепт за наполеон колачи со лиснато тесто и јагоди, кои имаат неверојатен вкус и одличен изглед.

Состојки:

• 500 г замрзнато лиснато тесто
• 1 ќесичка крем пудинг со вкус на ванила без варење од Витаминка
• 1 ќесичка шлаг пена од Витаминка
• 400 мл млеко
• 50-100 г шеќер во прав
• 1 ќесичка желатин
• 50 мл вода
• 300 г јагоди
• 50 г Синтагма какао крем за торти (чоколадо за готвење) за декорација по желба.

Подготовка:

1. Замрзнатото лиснато тесто извадете го од замрзнувачот и оставете го на собна температура 15 до 20 минути. Потоа исечете го на 12 еднакви квадрати.
2. Наредете ги парчињата лиснато тесто во тава обложена со хартија за печење и ставете ги во загреана рерна на 200 °C. Печете го лиснатото тесто 10 до 15 минути додека порумени.
3. Извадете го тестото од рерната и оставете го да се излади.
4. Во сад за матење ставете го крем пудингот од ванила и додајте 300 мл млеко. Изматете со миксер за време од 3-4 минути додека се добие густ крем.
5. Во друг сад за матење ставете ја шлаг пената и додајте 100 мл млеко. Изматете со миксер за време од 3-5 минути додека се добие густ шлаг. Во садот со крем пудингот додајте ја шлаг пената и изматете кратко за да се соединат состојките. По желба додајте шеќер во прав.
6. Во чаша или друг сад ставете го желатинот и додајте 50 мл вода. Измешајте и оставете го да набабри за време од 3 минути. Желатинот растопете го на оган или во микробранова печка, притоа внимавајте да не зоврие.
7. Во садот со пудингот додајте го желатинот и изматете со миксер околу минута до две. Филот оставете го 10-20 минути.
8. Коцките од лиснато тесто пресечете ги на половина (хоризонтално). Треба да добиете 24 парчиња.
9. Со готварски шприц ставете малку фил врз еден слој лиснато тесто. Потоа наредете неколку парчиња сечкани јагоди и додајте уште малку фил. Ставете друг слој од лиснато тесто, филувајте и додајте јагоди. На крај ставете уште еден слој лиснато тесто. Нанесете уште малку фил и додајте јагоди сечени на половина. Потребни се 3 квадрати од лиснато тесто за да се состави еден наполеон колач.
10. Чоколадото растопете го на пареа. Колачите декорирајте ги со растопено чоколадо по желба и шеќер во прав. Уживајте во светот на вкусовите!

Ви препорачуваме да прочитате: Индијанки со фил од пудинг.

Следете ја sezahrana.mk и на Instagram и Pinterest.

*Спонзориран рецепт.