Од овој рецепт излегуваат две векни посен празничен леб со рузмарин и ленено семе. Многу е декоративен, а има и богат вкус кој многу ќе го обожавате. Вештата и умешна Даниела е заслужна за прекрасниов празничен леб, затоа од срце и заблагодаруваме и со задоволство го споделуваме со вас!
Состојки:
- 500 гр брашно
- 200 мл млака вода
- 100 мл масло
- 20 гр свеж квасец
- 2 лажици свеж рузмарин
- 2 лажици ленено семе
- 10 зелени сечкани маслинки
- 6-7 лажици обарен спанаќ
- 1 лажица шеќер
- 1 лажица сол
Подготовка:
- Квасецот се става длабок сад во кој се додава млаката вода, една лажица шеќер и една лажица брашно. Смесата убаво се меша и се остава квасецот да нарасне.
- Откако квасецот ќе нарасне во садот се додаваат брашното, солта и маслото, па тестото убаво се меси.
- Потоа, се остава тестото да скисне, а откако ќе скисне се додаваат сечканиот спанаќ, сечканите маслинки, рузмаринот и лененото семе и тестото повторно се меси за да се изедначат состојките и така измесено се остава да нарасне.
- Нараснатото тесто се става во калапи за печење, а доколку немате калапи, може да го печите во тава. Калапите или тавата треба да бидат обложени со хартија за печење.
- Прво ставете го да се печи во рерна загреана на 180 степени, а откако горната површина ќе добие боја на печено, намалете ја температурата на 100 степени.
Рецептот го испратил: Даниела Џогова.