И овој пат нашата пријателка Диана, на блогот Trydiani ни претстави традиционален рецепт со одличен вкус. Рецептот за оваа салата од грав потекнува од Велинград, Бугарија, а традиционално се припрема со грав познат како „софенка“.
Тамошното население вели дека оваа сорта на грав успева само во тој регион, а карактеристично е тоа што зрната се големи, бели и се топат во устата. Гравот „софенка“ најдобро успева на засенчени места на надморска висина од 1000 до 1200м, а во споредба со другите мешунки има потреба од повеќе влага. Оваа салата од грав е посна, вегетаријанска, не содржи глутен, а може да ја послужите и како прилог со јадење.
Состојки:
- 1 кг грав
- 7-8 лажици масло
- 1 страк праз (во замена може да се користи млад кромид)
- 1 лажица црвена пипер
- суво нане
- црн пипер
- 1 мала лажичка сол.
Подготовка:
- Гравот исчистете го и ставете го во тенџере со ладна вода да отстои за време од 7 до 8 часа.
- Потоа тенџерето со грав ставете го на оган да се вари со истата вода, а по потреба додајте уште вода.
- Штом гравот ќе омекне додајте ја солта. Варениот грав тргнете го од оган, оставете го да се излади и потоа убаво исцедете го.
- Празот ситно исечкајте го. Во тава на оган ставете го маслото да се загрее. Во загреаното масло ставете го празот да се запржи.
- Потоа тргнете ја тавата од оган, извадете го празот и во маслото додајте го црвениот пипер. Измешајте, а потоа маслото ставете го во садот со исцедениот грав. Приготвената салата од грав зачинете ја со мелен црн пипер и нане по желба.