Растителните влакна се многу важни и во исхраната треба да се внесуваат што е можно повеќе преку избор на здрави и разновидни намирници. Тие докажано го намалуваат количеството на гликоза во крвта, го штитат организмот од дијабетес и срцеви заболувања и го снижуваат лошиот холестерол. Но, нивната најголема важност е во тоа што тие се заслужни за правилната дигестија на цревата. Затоа, во продолжение погледнете ја листата на намирници со чија помош ќе можете да внесувате повеќе растителни влакна во организмот.
Нутриционистите советуваат дека жените дневно треба да се внесуваат околу 25 грама растителни влакна, додека мажите дури 38 грама. Повеќето луѓе веруваат дека растителните влакна ги има само во житарките, но постојат уште многу други намирници кои изобилуваат со нив, а не содржат јаглени хидрати.
Авокадо
Авокадото е богато со витамините К и Е и содржи здрави масти, а исто така изобилува и со растителни влакна. Во едно авокадо со просечна големина има дури 13 грама растителни влакна. Посипете го со малку сол и јадете го како прилог, ставете го во тостот, испасирајте го во вид на путер, а исто така од него може да си припремите и многу вкусни намази.
Артичока
Една артичока со тежина од 160 грама содржи дури и до 9 грама растителни влакна, а само 17 грама јаглени хидрати. Можете да ги консумирате варени на пареа, печени или пак како салата.
Бобинкасто овошје
Иако сувите сливи се најбогати со растителни влакна, тие исто така содржат и многу шеќери, па можеби не секогаш се баш најдобриот избор. Наместо суви сливи, јадете бобинкасто овошје кое содржи 8 грама растителни влакна во една чаша.
Чиа семе
Од овие чудесни семенки, цревата магично ќе ви проработат. Можете да ги додавате во смуди, овесна каша, или пак да ги посипите врз грилован зеленчук и свежи салати.
Карфиол
Суровиот карфиол може да биде одлична ужина. Околу 265 грама карфиол содржат 5 грама растителни влакна и само 13 грама јаглени хидрати.
Кокосово брашно
Обично на листата на здрави намирници не се наоѓаат оние кои ги користиме за припрема на колачи, но тоа не е случај со кокосовото брашно. Две лажици кокосово брашно содржат околу 5 грама растителни влакна. Но, треба да се има на ум, дека кокосовото брашно нема да се смета за здраво доколку го консумирате во колачи, мафини, торти и слични десерти кои изобилуваат со шеќери.
Ленено семе
Само четири лажици ленено семе содржат дури до 8 грама растителни влакна, а покрај тоа имаат способност да го стабилизираат нивото на шеќер. Тие, исто така, го штитат организмот од инфекции и го намалуваат лошиот холестерол. Можете да го додавате во салати, смуди или јогурт, но можете да ги користите и за подготовка на разни колачи и печива.
Јаткасти плодови
Доколку сакате помеѓу оброците нешто да грицкате, тогаш изберете нешто здраво. Избегнувајте ги чипсите, смоките и соленките, а наместо нив изберете бадеми, лешници или ореви. Околу 30 грама бадеми ќе ви обезбедат 3,5 грама растителни влакна, додека пак лешниците околу 3 грама.
Псилиум
Псилиумот е одличен начин за во исхраната да додадете дополнителни влакна, бидејќи во само една лажица од него се содржат дури 5 грама растителни влакна. Можете да го купите во облик на прав и да го растворате во вода, или пак во облик на суплемент.
Ви препорачуваме да прочитате: 5 намирници кои се богати со растителни влакна и зошто да ги јадете редовно.