Дали знаете дека и во кулинарскиот свет пости мода? Модните трендови во светот на храната ја поттикнуваат желбата за дегустација и подготовка на различни рецепти. Понесена од новите модни трендови, Диана приготви чоколаден тарт без брашно, со мед и кокосово масло.
Нас ни останува да го дегустираме и овој пат да се засладиме со поздрав десерт!
Состојки:
- 100 грама темно чоколадо, минимално со 50% какао
- 50 грама кокосово масло
- 1/3 чаша мед или ½ чаша шеќер
- ¼ чаша какао во прав, 22% масленост
- прстофат сол
- ½ мала лажичка инстант кафе
- 2 јајца.
За чоколадна глазура:
- 100 грама чоколадо
- 100 мл течна павлака
- 10 грама кокосово масло.
Подготовка:
- Рерната се загрева на 175 степени. Силиконските форми (вкупно 3) за тарт се премачкуваат со масло.
- Кршеното чоколадо заедно со кокосовото масло се топат на пареа. Во садот со растопеното чоколадо се додаваат медот, јајцата едно по едно и смесата се меша. На крај се додаваат какаото, кафето и прстофат сол. Се продолжува со мешање.
- Чоколадната смеса се става во приготвените калапи. Тартот се пече за време од 20-25 минути.
- Колачите се вадат од рерната и се оставаат кратко да се изладат. Потоа се вадат од калапите. Најдобро е тартовите да останат преку ноќ во калапите, а потоа полесно ќе се извадат.
- Во тенџере на оган, на умерена температура се ставаат парчињата чоколадо, павлаката и кокосовото масло. Се меша додека се добие хомогена чоколадна смеса. Тартовите се преливаат со чоколадна глазура. Се сервираат со изматена шлаг пена, лешници и јагоди по желба. На здравје!
Ви предлагаме да прочитате: Домашен тарт со вишни.