Велигденска венец погача со желе бонбони • Сè за храна

„Неверојатно е вкусна, а полесна погача немате направено! Сигурна сум дека ве интересира како постигнав да е превкусна, брза и лесна за подготовка, па топло препорачувам да го пробате мојот рецепт за Велигденска венец погача. Мека како памук и декорирана со желе бонбони, идеална за празничната трпеза!“ – срдечно споделува Катерина од нашиот тим и ви препорачува да ја пробате што поскоро нејзината лесна Велигденска погача.

“Ги охрабрувам и најнеискусните да пробаат, а во описот подолу ќе ви ставам детални инструкции.“ – додава Катерина Шамбевска Спасеновска, фуд блогер и уредник на sezahrana.mk.

Состојки:

За тесто:

1 ќесичка сув квасец
3 лажици шеќер
прстофат сол
125 мл млака вода
125 млако млеко
125 масло
1 ќесичка ванилин шеќер од Фантазија
500 г брашно.

Додаток:

100 г желе бонбони Дониа.

Подготовка:

Состојките за тестото ставете ги во сад за месење. Започнете прво од сувите состојки, додајте ги сите, измешајте со лажица, а потоа додајте ги и течните состојки. Убаво измешајте со лажицата, а откако малку ќе се оформи, месете со раце додека добиете меко и мазно тесто.
Добро измесеното тесто покријте го со кујнска крпа и оставете го да нарасне околу 30-40 минути, зависно од собната температура.
Во меѓувреме исечкајте ги желе бонбоните на мали коцки и оставете ги во посебен сад.
Надојденото тесто може да го оформувате на 2 начини. Полесниот е, ако од целото тесто одеднаш оформите правоаголна форма (јас ја оформувам со раце, а можете и со сукало/оклагија) и врз неа ги распоредите коцките од желе бонбони, па да пресечете со нож по должина и од двата дела да оформите 2 ролни повторни свиткани по должина. Или, ако имате желба, поделете го тестото на 2 дела, па поединечно правете правоаголници, редете од коцките од желе бонбони и потоа оформете ги ролните исто по должина. Јас правев по првиот метод кој ви го опишав и резултатот може да го видите на сликите, супер излезе. Важно е ролните убаво да ги затворите кога ќе завршите со виткањето, за желето да не излегува надвор од тестото.
Со раце, ролните нежно растегнете ги и завртете ги една врз друга за да оформите венче.
Јас печев во кружен калап претходно обложен со хартија за печење, а ако немате, можете да печете во обичен плех, обложен со хартија.
Вака припремената Велигденска венец погача, ставете ја да се пече во претходно загреана рерна на 170-180 степени, за време од 35 до 40 минути, зависно од вашата рерна. А, по потреба, намалете ја температурата на 150 степени, на половина од печењето.