Дали досега сте пробале интерконтинентал торта? Таа е една од највкусните, па ако ја немате направено, сега имате супер рецепт кој ни доаѓа од кујната на Невена. Тортата е идеална за секакви сечени прилики, родендени, матури, свадби…
Сите кои ја пробале ја обожаваат, а карактеристична е по тоа што се прави со 3 слоеви на крем со различен вкус. А Невена ни ја предлага оваа убава торта со фил од лешници, бело чоколадо и кафе. Топ комбинација за максимално засладување!
Состојки:
- 10 белки
- 10 лажици шеќер
- 2 лажици масло
- 4 лажици брашно
- 13 лажици мелени ореви
- 2 лажички прашок за печиво.
Фил:
- 10 жолчки
- 200 гр шеќер
- 500 мл млеко
- 4 полни лажици густин
- 1 полна лажица брашно
- 180-200 гр путер собна температура
- 50 гр бело чоколадо стопена над пареа и изладено
- 100 гр мелени лешници
- 1 лажица инстант кафе.
Подготовка:
- Белките со шеќерот изматете ги со миксер во цврст снег. Исклучете го миксерот и додајте ги маслото, оревите, брашното и прашокот за печиво. Измешајте со шпатула да се изедначи смесата.
- Смесата за пандишпанот ставете ја во плех намачкан со масло и посипан со брашно. Израмнете ја и ставете ја да се пече во претходно загреана рерна на 180 степени околу 20 минути. Печениот пандишпан оставете го да се излади.
- Додека пандишпанот се пече, започнете со подготовка на филот. Млекото со половина од шеќерот ставете ги да зовријат.
- Жолчките изматете ги со другата половина од шеќерот, брашното и густинот да нема грутчиња па додајте ги во зовриеното млеко. Сварете густ пудинг. Тргнете го настрана и покриен оставете го да излади.
- Путерот изматете го со миксер. Во садот со путерот постепено додајте го варениот пудингот и продолжете со миксирање додека кремот убаво се изедначи и биде мазен.
- Готовиот фил поделете го на три дела. Во едниот додајте го кафето, во вториот дел мелените лешници, а во третиот растопеното чоколадо. Убаво изматете ги да се изедначат во кремот.
- Ставете ги во фрижидер малку да се стегнат пред да ја филувате тортата затоа што при работа кремот малку се пушта.
- Пандишпанот исечете го на три еднакви ленти. На подлога за торта ставете една лента премачкајте ја со филот од лешници, па друга лента – фил со кафе, трета лента – фил со чоколадо. Или редоследот на филовите можете сами да го одредите. Целата торта премачкајте ја и украсете ја со слатка павлака.
- Пред да ја сечите, готовата интерконтинентал торта оставете ја во фрижидер убаво да се стегне. На здравје!
Рецептот го испратил: Невена Ѓероска.
Ви предлагаме да прочитате: Чоколадна торта со јагоди и слатка павлака.