За љубителите на нови вкусови и интернационалната кујна, Катерина им предлага интересен рецепт за нудли со печурки и тиквички, припремени на кинески начин. Рецептот вреди да се проба!
Состојки:
- 160 гр нудли
- 1 рамна лажичка рендан свеж ѓумбир
- 1 суво луто пиперче
- 6 чешниња лук
- 1 помала тиквичка
- 12 свежи шампињони
- 2-3 лажици соја сос
- 1 мала лажичка јаболкова киселина
- 4 лажици масло од сусам (во замена може да користите маслиново масло)
- 1 лажичка сецкан свеж коријандер по желба
- 1 перце млад кромид
- 5 лажици вода
- по потреба сол.
Подготовка:
- Во солена зовриена вода ставете ги нудлите да се варат и варете согласно упатството наведено на пакувањето. Штом нудлите ќе се сварат, тенџерето тргнете го од оган. Потоа исцедете ги нудлите и ставете ги во сад.
- Тиквичката исечете ја на тенки листови со помош на нож за лупење на компири. Во тенџере со зовриена вода ставете ја исечканата тиквичка да се обари најмногу 2 минути.
- Пиперката и лукот ситно исечкајте ги. Шампињоните исечкајте ги на листови.
- Во тава на оган ставете го маслото од сусам, сечканото луто пиперче, ренданиот ѓумбир и сечканото лукче. Кратко пропржете ги, а потоа додајте ги шампињоните.
- Откако ќе испари водата од печурките, во тавата додајте ги обарените листови тиквичка, сечканиот коријандер, соја сосот, јаболковата киселина и водата. Промешајте ги состојките.
- Потоа исклучете го шпоретот и додајте ги сварените и исцедени нудли.
Промешајте убаво и сервирајте ги. Врз приготвените нудли со печурки и тиквичка наросете ситно сечкан млад кромид. На здравје!
Рецептот го испратил: Катерина Милошевска Глигороска