Многупати сме напишале, а ќе кажеме и сега дека едноставните рецепти ни се омилени. А кога истите се здрави и лесни за подготовка, тоа е прав погодок за нас! Овој пат ви предлагаме токму таков рецепт. Одвојте малку време и направете печена брокула со моркови.
Ова здраво јадење е посно, вегетаријанско и не содржи глутен. Богато е со хранливи состојки и растителни влакна. Може да ги послужите како прилог со месо или како главно јадење во комбинација со свежа салата. Како и да се одлучите, тоа ќе биде вистински избор!
Може да ве интересира: Најдобар начин за приготвување на брокула.
Состојки:
- 1 главица брокула
- 5 до 6 моркови
- 2 лажици маслиново масло
- 1 лажица свежо цеден сок од лимон
- 2 чешниња лук (во замена може да користите лук во прав)
- 2 лажици сусам
- рендан пармезан по желба
- сол и мелен црн пипер по вкус.
Подготовка:
- Пуштете ја рерната да се загрева на температура од 210 степени.
- Брокулата исечете ја на цветови.
- Морковите исечете ги на тенки кругови.
- Во тава обложена со хартија за печење ставете ги брокулата и сечканите моркови.
- Попрскајте ги со маслиново масло и зачинете со сол и мелен црн пипер.
- Чешнињата лук издробете ги со алатка или исечкајте ги ситно. Потоа додајте ги во тавата со зеленчуците.
- Наросете со сусам.
- Со помош на прстите измешајте ги брокулата и морковите за да се распоредат маслото, сусамот и лукот.
- Тавата ставете ја да се пече во загреаната рерна за време од 20 минути. Зеленчуците не треба да бидат целосно омекнати, туку малку да крцкаат.
- Печените зеленчуци оставете ги кратко да се изладат. Топлата печена брокула со моркови сервирајте ги во чинија и попрскајте ги со свежо цеден сок од лимон и пармезан по желба. На здравје!
Ви предлагаме да прочитате: Киноа со брокула и моркови.