Пица со бел фил и спанаќ за 10 минути - протеински топинг • Сè за храна

,,Обожавам да правам нови и вкусни комбинации, а пред сѐ нутритивно богати! Овој пат смислив поинаква пица со бел фил која ќе ве угости добро и ќе ви биде идеална замена на стандардниот пица вкус.” – срдечно споделува Катерина Шамбевска Спасеновска од нашиот тим.

,,Заради експресно брза подготовка, искористив готово тесто, а по желба може да си приготвите и сами по свој вкус. ” – додава Катерина, а за повеќе интересни рецепти од неа, погледнете го нејзиниот Инстаграм профил @katerina.shambevska.

Пица со бел фил и спанаќ за 10 минути - протеински топинг

Состојки:

*За една пица:

готово тесто за пица
1-2 лажички путер
5-6 листови спанаќ зависно од големината
5-6 лажички изварка
5-6 лажички протеински јогурт
2-3 лажици Кораб рендано биено сирење
неколку ленти кашкавал по вкус
по желба, прстофат сол и црн пипер
1 јајце.

Подготовка:

Тестото прво премачкајте го со путерот – за полесно размачкување оставете го да постои на собна температура.
Листовите спанаќ измијте ги и нежно притиснете ги меѓу 2 слоеви на кујнска крпа да се исушат, па наредете ги врз тестото премачкано со путер.
Потоа, рамномерно распоредете ги изварката, протеинскиот јогурт, биеното сирење и кашкавалот.
По желба посолете и додајте црн пипер, ќе му даде посебен шарм на јадењето.
Вака припремената пица со бел фил печете ја во загреана рерна на 250 степени прво 6 минути, па извадете ја, скршете јајце и печете ја уште 4 до 5 минути. На здравје!

Совети плус:

Јајцето немојте да го препекувате оти ќе се стврдне и ќе биде тегаво за јадење штом се излади.
Протеинскиот јогурт може да го замените со павлака или Natura krem од Млекара Тетово.
Ако ми го пробате рецептот не пропуштајте да споделите со мене, ќе ми значи да слушнам како ви се допаѓа мојата креативност во кујната.