Супер рецепт за сите оние кои обожаваат да грицкаат нешто додека гледаат телевизија или пак во комбинација со пиво. Убавото кај овој рецепт е тоа што овие посни солени бисквити многу лесно и брзо се прават, а уште побрзо се јадат. Одлични се за мезење со добро друштво, а нас нѐ фасцинира тоа што може да се комбинираат со разни намази и да се прават во повеќе вкусови.
Па што чекате? Направете ги овие посни солени бисквити и поканете го вашето друштво на филмска вечер или на гледање спортски натпревар. Едноставно препуштете му се на уживањето. Можете да ги направите и спакувате во корпа за пикник, па да ги искористите за убав пролетен излет во природа, а за во дождливите денови за гледање филм со пријателите. И што е најважно, рецептот ни доаѓа од кујната на Лана.
Состојки:
- 15 г свеж квасец
- 150-175 мл вода
- прстофат сол
- 200 г брашно
- 150 г пченичен гриз
- 4 лажици маслиново масло
- маслинки, оригано, сусам по желба
Подготовка:
- Во длабок сад измешајте ги брашното, пченичниот гриз и солта (по желба можете да додадете и малку оригано или некоја друга зачинска билка по ваш вкус).
- Во садот додајте ги водата, маслиновото масло и сувиот квасец и замесете тесто.
- Вака подготвеното тесто поделете го на два дела, од кои едниот ќе го ставите во фрижидер, а другиот ќе го развлечете во тенка кора со помош на сукало.
- Од развлеченото тесто со помош на калап во форма на круг, исечете бисквити. Парчињата наредете ги на плех обложен со мрсна хартија за печење, без притоа да оставате простор помеѓу нив.
- Откако ќе го наредите целиот плех, секоја бисквита боцнете ја на три места со виљушка.
- Вака подготвените бисквити ставете ги да се печат во загреана рерна на 200 степени, додека додека заруменат.
- Повторете ја целата постапка и со тестото кое претходно го ставивте во фрижидер.
- По ваша желба, во тестото може да додавате и маслинки, зачини или пред печење да ги поросите со сусам и семки од сончоглед. Изборот е ваш, а бисквитите ќе бидат превкусни без разлика за која комбинација и да се одлучите.
- Може да ги послужите во комбинација со разни намази по ваша желба, како што се ајвар, хумус или намаз од сирење. На здравје!
Ви препорачуваме да прочитате: Мини срциња – солени грицки со сирење.