Многумина обожаваат салати со вкусни преливи. Цезар, прелив со јогурт, прелив со зачини… Листата на преливи – сосови кои може да ги користите е долга, а оброк салатите добредојдени во било кое време. А сега во вашата тетратка со омилени рецепти запишете го овој прелив за салати со јогурт, зачини и авокадо. Сигурни сме дека ќе го засакате, бидејќи салатите добиваат многу подобар и поинтензивен кремаст вкус.
Од друга страна, авокадото изобилува со здрави масти, па приготвената салата ќе биде многу похранлива и ќе заменува комплетен оброк. На кратко би рекле: ем вкусен, ем здрав прелив кој може да го додавате во секоја салата.
Состојки:
- 2 чаши јогурт
- 1 авокадо
- свежо цеден сок од 1 лимон или лимета
- 2-3 гранчиња свеж магдонос
- 1 чешне лук
- ¼ лажица лута буковска пипер по желба
- 1 лажица масло
- морска сол
- мелен црн пипер по вкус.
Подготовка:
- Авокадото пресечете го на половина и извадете ја семката. Со помош на лажица извадете ја внатрешноста од лушпата.
- Лукот иситнете го со помош на преса, а доколку немате ваква алатка ситно исечкајте го.
- Потоа во блендер ставете ги јогуртот, парчињата авокадо, лимоновиот сок, магдоносот, лукот, маслото, посолете со морска сол и свежо мелен црн пипер. По желба додајте лута буковска пипер. Блендирајте додека добиете мазна и кремаста смеса. Доколку преливот е многу густ додајте уште малку јогурт и масло.
- Вака подготвениот прелив за салати може да го чувате до 1 недела во фрижидер во херметички затворен сад.
- На крај, направете салата со домати, краставици, марулка и други зеленчуци по избор и додајте од приготвениот сос.
Ви препорачуваме да прочитате: Цезар салата со пилешко месо.