Ако ви се најавиле блиски пријатели, а сакате да ги изненадите со нешто вкусно, но немате многу време ви предлагаме да го пробате рецептот за солени мафини.
Брзо, лесно и едноставно се подготвуваат овие солени мафини со грашок, кашкавал и шунка, а сигурни сме дека ќе им допаднат на целото друштво. И благодариме на Невена за одличниот рецепт, а на нас ни останува да ги пробаме солените мафини кои одлично изгледаат.
Состојки:
- 100 гр брашно
- 100 мл млеко
- 50 мл масло
- 50 гр кашкавал
- 50 гр грашок
- 2 лажици магдонос
- 100 гр шунка
- 2 јајца
- 1 лажиче прашок за печиво
- 1/2 лажиче сода бикарбона.
Подготовка:
- Кашкавалот изрендајте го на крупната страна на рендето. Шунката исечкајте ја на мали коцки. Магдоносот ситно исечкајте го.
- Во сад за матење ставете ги јајцата, млекото и маслото. Јајцата убаво изматете ги со жица за матење за да се добие хомогена смеса.
- Во садот со јајца додајте ги брашното, претходно измешано со прашокот за печиво и сода бикарбона. Убаво измешајте ја смесата.
- Потоа, во садот додајте ги ренданиот кашкавал, грашокот, магдоносот и шунката. Добро измешајте за да се соединат состојките.
- Калапот за мафини обложете го со хартиени кошнички. Од смесата со помош на лажица, наполнете ги калапите за мафини.
- Мафините печете ги во загреена рерна на 180 степени за време од 20-25 минути. Потоа извадете ги од рерната и оставете ги да се изладат.
- Ладните солени мафини со грашок, шунка и кашкавал послужете ги со кисела павлака.