Пробајте ја вкусната туна салата со прелив кој ќе го приготвите сами. Доаѓа од интернационалната кујна, а позната е уште под името „Nicoise“ туна салата, како што е насловена и на страницата partial-ingredients.com каде го најдовме рецептот.
Состојки:
За смесата од туна:
- 350 гр туна (може исечкана или во парчиња)
- 2 лажички мајонез
- 1 лажиче сенф
- малку ситно сечкан црвен кромид
- неколку сечкани црни маслинки.
За салата:
- 2 поголеми листови сечкана салатка
- 1 поголем црвен домат исечен на парчиња
- 10-тина цели црни маслинки
- малку црвен кромид сечкан на долги кришки
- 3 тврдо варени јајца исечени на тенки кругови.
За прелив:
- 2 лажици маслиново масло
- 2 лажици сок од лимон
- 1 лажичка мед
- 1 лажичка сенф
- сол и црн пипер по вкус.
Количината е доволна за 2 порции.
Подготовка:
- Во сад измешајте ги туната, мајонезот, сенфот, ситно сечканиот кромид и сечканите маслинки. Измешајте ги и смесата од туна е готова.
- Во друг сад подгответе го преливот. Измешајте ги маслиновото масло, медот, сокот од лимон, сенфот, солта и црниот пипер.
- Во сад за сервирање ставете ги исечените листови салатка, парчињата домат, кришките од кромид и круговите од јајца.
- На средина додајте ја туна смесата, а потоа прелијте со преливот и внимателно промешајте.
На здравје!