Многу сакаме брзи и лесни рецепти, а кога се приготвуваат само од неколку состојки тоа е вистинскиот избор за нас. Ако се сложувате, овој вкусен рецепт мора да го пробате. Марија од нашиот тим нѐ заслади со супер вкусни и брзи бомбици приготвени само од 3 состојки.
Подготовката е едноставна, а убавата комбинација од мелени бисквити, мармалад од кајсии и лешници ќе го освои сечиј вкус. Овој рецепт може да го приготви секој, па поканете ги најмалите членови да ви помогнат и поминете забавно време во кујната. Од наведените состојки ќе добиете 15 бомбици, а по желба количината на состојките зголемете ја.
Состојки:
- 100 г бисквити
- 50 г лешници
- 2 лажици мармалад од кајсии од Рес-Ком
- 2 лажици вода.
За декорација:
- 100 г бело чоколадо, мелени лешници или бисквити по избор.
Подготовка:
- Бисквитите измелете ги во сечко или со помош на машина за мелење.
- Лешниците кратко потпечете ги и измелете ги.
- Во мал сад на оган ставете ги мармаладот од кајсии и водата. Измешајте и кратко затоплете ја смесата додека мармаладот се раствори.
- Во длабок сад ставете ги мелените бисквити, лешниците и растопениот мармалад. Измешајте добро, а потоа од смесата формирајте бомбици.
- Белото чоколадо растопете го на пареа или во микробранова печка. Бомбиците чоколадирајте ги или по желба извалајте ги во мелени лешници и бисквити.
- Послужете ги со омиленото кафе, на здравје!
Препорака од авторот:
Мали, симпатични и многу вкусни! Така можам да ги опишам овие брзи бомбици. Ми се највија гости, па мораше да се приготви нешто домашно, но вкусно. Имав мармалад од кајсии од Рес-Ком, го искомбинирав со бисквити и лешници и добив супер комбинација. На крај колачињата ги чоколадирав и ги послужив. Се надевам дека ќе го испробате и овој мој рецепт, а ако го направите, испратете ми слика, пишете ми како ви се допаднале, следете ме и тагирајте ме на Instagram или објавете ги во групата на Сѐ за храна.“ – вели Марија.
За сите прашања околу подготовката пишете и на Марија Кочовска (следете ја на Facebook и Instagram) од нашиот тим која ги направи и фотографира брзите бомбици.
Ви препорачуваме да прочитате: Чоколадна раванија со мармалад и слатка павлака.
Следете ја sezahrana.mk и на Instagram и Pinterest.
*Спонзориран рецепт.