Есента е време кога мирисот на печени пиперки ги исполнува сите дворови и домови, а традиционалната зимница го добива својот посебен шарм. Покрај класичниот црвен ајвар, зелениот ајвар – познат како малиџано – е вистински бисер на нашата трпеза. Со совршена комбинација од сочни зелени пиперки, печен модар патлиџан и благ додаток на сенф, овој рецепт нуди богат, кремаст и уникатен вкус што освојува на првиот залак.
Овој рецепт го имаме испробано многупати и секогаш нѐ одушевува со својата совршена текстура и деликатесен вкус, па затоа топло ви го препорачуваме за вашата домашна зимница!

Состојки:
- 1 вреќа зелени пиперки (околу 25-30 кг пиперки)
- 10 средно големи модри патлиџани
- 1,5 литри масло
- 100 грама шеќер
- околу 50 мл вински оцет
- сол по вкус
- 4 лажици сенф.
Подготовка:
- Подготовка и печење на пиперките: Пиперките најпрво убаво се мијат, а потоа им се отстрануваат дршките и семките. Се печат и веднаш се собираат во поголем затворен сад.
- Цедење: Излупените пиперки се ставаат во цедалка да се цедат барем неколку часа (најдобро преку ноќ).
- Подготовка на модрите патлиџани: Модрите патлиџани се лупат, се печат во рерна и се мелат. По желба, можете да ги испечете и цели со сè кора, па потоа да ги излупите и сомелете.
- Мелење и започнување со пржење: Исцедените пиперки се мелат ситно на машина за месо и се ставаат во поголемо тенџере/казан на оган да се пржат.
- Сложување на состојките: Откако ќе испари вишокот течност од пиперките и малку ќе се запржат, се додаваат претходно подготвените и сомелени модри патлиџани. Се пропржува кратко заедно, а потоа се додаваат маслото, винскиот оцет, шеќерот и солта. Сè убаво се меша за да се соедини.
- Пржење: Пржењето трае околу 2 часа со непрекинато мешање. Знаете дека ајварот е готов кога ќе добие добра густина, ќе остава трага на дното од тенџерето при мешање и лесно ќе се „лепи“ за дрвената лажица.
- Завршен чекор со сенф: Oколу 10 минути пред крајот на пржењето, се додаваат 4 лажици сенф и убаво се промешува.
- Стерилизација и пакување: Готовиот топол ајвар се собира во претходно затоплени тегли (на 50°C). Теглите добро се затвораат со капаци и се оставаат во топла рерна уште 15-тина минути (или се завиткуваат во ќебе) за постепено вакумирање и ладење.
Може да те интересира: Традиционален македонски ајвар.
