Гитара торта со рум и ванила е совршена за убави свечени поводи, празнувања и гости. Декоративна е и симпатична на пресек, има богат вкус со ореви во својот состав, а уникатната арома со сензации на рум и ванила ја прави вистинско вкусно задоволство!
Состојки:
Светол пандишпан (се прави 2 пати):
- 2 јајца
- 80 гр шеќер
- 10 гр ванила
- 60 мл масло
- 100 гр брашно
- 1 лажиче прашок за печиво (5 гр).
Темен пандишпан:
- 6 белки
- 120 гр шеќер
- 100 гр мелени ореви
- 2 лажици (40 гр) брашно
- 1 лажиче прашок за печиво.
Фил:
- 6 жолчки
- 200 гр шеќер
- 600 мл млеко
- 100 гр нишесте
- 1 ќесичка ванилин шеќер
- 250 гр путер на собна температура
- 200 гр чоколадо за готвење.
Прелив за корите на светлиот пандишпан:
- 120 мл вода
- 1 полна лажица шеќер
- 1 екстракт од рум (2 мл).
Подготовка:
- Најпрво се започнува со подготовка на светлиот пандишпан. Јајцата се матат со шеќерот и ванилата додека станат кремасти.
- Се додава маслото, а потоа брашното и печивото, па кратко се матат со миксерот за да се соединат.
Смесата се тура во калап/тава (големина 26), претходно намачкан со путер и набрашнет. - Се пече во загреана рерна на 180 степени, околу 15-20 минути. Оваа смеса се подготвува 2 пати, бидејќи се реди како основен и горен слој.
- Подготовка на прелив. Водата и шеќерот се ставаат да зовријат, се трга на страна и се додава екстрактот од рум.
- Подготовка на темен пандишпан. Белките се матат со шеќерот додека се добие цврст снег, а потоа се додаваат оревите, брашното, печивото и се мешаат со лажица за да се изедначат.
- Смесата се тура во калап/тава (големина 26), претходно намачкан со путер и набрашнет, се рамни и се пече во загреана рерна на 180 степени околу 15-20 минути.
- Подготовка на фил. Со миксер кратко се матат жолчките и со продолжено матење за да се изедначат и да нема грутчиња, се додаваат ванилата, шеќерот, нишестето и малку од млекото.
- Останатото млеко се става да се загрее. Пред да зоврие се тура смесата со жолчките и на тивок оган постојано се меша со лажица или жица додека се згусти како пудинг.
- Се трга од огнот, се покрива и се остава да се излади.
- Се мати путерот, кон кој лажица по лажица се додава од пудингот, а откако ќе се оформи изедначена смеса, се додава претходно стопеното и оладено чоколадо.
- Филовање. На подлога за торта се реди едниот светол пандишпан, се прска со половина од преливот и се мачка со фил.
- Потоа се реди темниот пандишпан и се мачка со фил.
- На крај се реди вториот светол пандишпан, се прска со преливот и се мачка со преостанатиот фил.
- Се декорира по желба и се остава во фрижидер да се стегне.
Кој не би сакал да проба парче вкусна торта со рум и ванила за да ужива во исклучителната арома?! Веруваме со ваков изглед и состав, никој не би останал рамношушен!
Рецептот го испрати Невена Ѓероска.