Ако ви досадило да јадете месо секојдневно, а не знаете што вкусно и посно да си подготвите, ви предлагаме еден рецепт за макало од праз и пиперки, кој сосем случајно го испробавме во нашата кујна и прерасна во еден од омилените посни рецепти. Вкусот е многу добар, топло препорачуваме да го пробате!
Убавото во овој рецепт е што состојките, вкусот, количината, може да ги менувате секој пат во различен сооднос, да изоставите некоја по потреба или вкус и повторно да имате во чинијата нешто многу вкусно. Не одзема многу време и тоа го прави уште подобар. Состојките вообичаено ги имаме сите во домот, па еве како се прави.
Состојки:
- 2 страка праз
- 10 суви пиперки (може и свежи зависно од сезоната)
- 2 средно големи компири
- вода по потреба
- 1-2 чешниња лук или лук во прав по вкус
- сол и црн пипер по вкус
- малку магдонос по желба
- масло по потреба.
Подготовка:
- Започнете од пиперките. Измијте ги, исчистете ги од семето и отворени по должина ставете ги да се варат.
- Компирите измијте ги, излупете ги и исечете ги на кругови, па може да ги варите во садот заедно со пиперките.
- Празот измијте го и излупете го, а потоа ситно исечкајте го. Ставете го во тава и додајте малку вода и масло. Оставете го да се динста додека омекне, а по потреба додајте уште малку вода.
- Водата во која се вареле пиперките не ја фрлајте, а претходно сварените пиперки излупете ги од лушпите. Најлесно ќе го изведите тоа, ако со едната рака ја држите притисната пиперката, а со другата рака, со помош на лажица ја стружите пиперката.
- Откако сте ги отстраниле лушпите од пиперките, заедно со компирите, смесата испасирајте ја во вид на пире.
- Додајте малку од водата во која се вареле пиперките, повторно испасирајте и додајте ја смесата во тавата со омекнатиот и издинстан праз.
- Лукот излупете го и ситно исечкајте го.
- Пропржете го макалото барем 10-тина минути за да стане кремасто и поврзано, а во тоа време додајте го лукот, сол и црн пипер по вкус, како и малку масло ако има потреба.
- Акододавате магдонос, најдобро тоа да биде на крајот и да е ситно сечкан. На здравје!
Совет плус: Лукот може да го изоставите ако сакате да ја нема неговата арома. Испробано вкусно е и на тој начин, а празот приготвен вака, скоро и да нема мирис кој се чувствува после јадењето. Исто така, по желба како прилог може да додадете маслинки или сирење.
Ви препорачуваме да прочитате: Зачинето пире со праз и суви пиперки (посно).