Имаме традиционален рецепт од белоруската кујна за вегетаријански ќофтиња со компири и тиква! Станува збор за ќофтиња кои се познати под името драники, а се приготвуваат со рендани компири, јајца, брашно и кромид, а по желба може да се додадат и други состојки како тиквички, тиква, мелено месо, печурки, сирење…
Предлогот ни доаѓа од нашата пријателка Диана, која успешниот рецепт го објави на блогот Trydiani. Подготовката е навистина едноставна, па рецептот мора да се проба.
Состојки:
- 3 компири
- 250 грама тиква
- 1 страк млад кромид
- 1 големо јајце
- 1 до 2 супени лажици брашно
- сол, црн пипер и индиско оревче по вкус
- 1 лажица сечкан свеж копар или магдонос
- масло за пржење по потреба.
Подготовка:
- Тиквата излупете ја и изрендајте ја на крупната страна од рендето. Ренданата тиква ставете ја во сад за месење.
- Компирите излупете ги и изрендајте ги на крупната страна од рендето. Доколку компирите се сочни, течноста отстранете ја.
- Во садот со ренданата тиква, додајте ги ренданите компири. Измешајте ги.
- Младиот кромид ситно исечкајте го и додајте го во садот со компирите и тиквата.
- Во садот додајте ги и копарот и зачините. Измешајте додека се добие хомогена смеса.
- Додајте го јајцето и измешајте. Потоа додајте го и брашното. Добиената смеса не треба да биде многу ретка.
- Во нелеплива тава на оган, на умерена температура ставете масло да се загрее. Со лажица земете од смесата и формирајте ќофтиња. Ќофтињата ставете ги да се пржат во загреаното масло од двете страни додека добијат златеста боја.
- Пржените ќофтиња извадете ги и ставете ги врз кујнска салфетка за да се впие вишокот на масло. Сервирајте ги додека се топли. На здравје!
Ви предлагаме да прочитате: Вегетаријански ќофтиња со праз, компири и тиквичка.