Специјалитетот хачапури ѝ припаѓа на грузиската национална кујна, но е познато јадење во целиот свет. Многу е вкусно и едноставно. Рецептот ни го подготви Ана Наумовска, а ние со задоволство го споделуваме со вас.
Доколку сакате да вкусите нешто поразлично, имаме совршена идеја за вас. Пробајте грузиски хачапури. Бидете креативни и направете ги со фил по ваша желба. Може да користите сирење, кашкавал, па дури и месо. Во секој случај ќе бидат превкусни. Пробајте ги и пишете ни во групата на Сѐ за храна која комбинација најмногу ви се допаѓа.
Состојки:
- 1 кг брашно
- 2 лажици сув квасец
- 1 лажица шеќер
- 1 лажичка сол
- 500 мл топло млеко
- 250 мл масло
- 2 белки (жолчките се користат за премачкување).
За наросување:
- сусам.
За фил:
- околу 500 г рендан кашкавал
- 6-8 јајца
- сол и зачини по вкус.
Подготовка:
- Во длабок сад ставете ги брашното, квасецот, шеќерот и солта. Додајте ги белките, млекото и маслото и замесете тесто.
- Тестото поделете го на шест еднакви топчиња и оставете ги 15 минути.
- Со помош на сукало од секое топче расукајте кора. Од двете страни на кората ставете рендан кашкавал. Потоа, двата краја свиткајте ги навнатре.
- Краевите премачкајте ги со јајце и наросете сусам.
- Вака подготвените хачапури ставете ги во загреана рерна на 200 степени околу 10 минути.
- Извадете ги од рерната и во средината скршете едно или две јајца. По желба, можете да додадете и спанаќ. Зачинете ги и посолете ги по вкус и вратете ги во рерна да се печат уште 15 минути. Времето за печење може да варира во зависност од рерната.
- Готовите хачапури послужете ги додека се топли. На здравје!
Автор на рецепт: Ана Наумовска (baked_with_love_by_ana).
Ви препорачуваме да прочитате: Рецепт за турски симит.