Домашен џем од смокви • Сè за храна

Време е да ја направиме највкусната зимница и во шпајзот да ги наредиме теглите со домашен џем, слатко, мармалад… Убаво е да има од сѐ по малку, за бескрајно уживање во поладните денови. Ако го обожавате џемот од смокви и сакате да си направите дома, еве супер рецепт! Смокви во комбинација со ванила, цимет и рум за совршено уживање во светот на вкусовите!

Може да го намачкате на парче леб за појадок, слатка ужина или да го додате врз вафли и палачинки. А на sezahrana.mk може да најдете и вкусни рецепти со џем од смокви.

Состојки:

1 кг зрели смокви
200-250 г шеќер
2 ќесички ванилин шеќер од Витаминка
1 лимон
1 лажица рум
1 лажичка мелен цимет од Витаминка.

Подготовка:

Смоквите измијте ги, тврдата кора отстранете ја, а потоа исечете на четвртини. Ставете ги во подлабоко тенџере.
Лимонот измијте го и излупете го жолтиот дел од кората без бел слој. Исчистениот лимон преполовете го и исцедете го сокот.
Во садот со смоквите, додајте ги шеќерот и сокот од лимон. Тенџерето покријте го со кујнска крпа и оставете ги смоквите да се маринираат 1 час на собна температура.
Во смоквите додајте ја кората од лимон и ставете го тенџерето на оган да се вари. Откако ќе зоврие намалете ја температурата и варете уште 30 минути. Повремено мешајте на 4-5 минути и отстранувајте ја пената од површината.
По половина час варење, отстранете ја кората од лимон. Ако кората од смоквите не е распадната извадете ја и ситно исечкајте ја. Смоквите изгмечете ги или испасирајте ги со рачен блендер. Во садот додајте ги ванилиниот шеќер, румот и мелениот цимет. Варете уште 15 минути. Џемот е готов кога остава трага при мешањето.
Чистите тегли и капаци стерилизирајте ги 10 минути во загреана рерна на 150 степени.
Во теглите ставете од топлиот џем. Притоа оставете околу 1 см под работ на теглата. Затворете ги теглите и превртете ги наопаку 5-10 минути. Потоа, вратете ги во нормалната позиција, ставете ги во исклучената рерна или завиткајте ги во ќебе и оставете ги постепено да се изладат на собна температура.
Готовиот џем послужете го за појадок или ужина. Уживајте во светот на вкусовите!

Совети плус:

Бојата на џемот ќе зависи од бојата и зрелоста на смоквите.
Вкусот ќе зависи од видот на смоквите. Темните смокви имаат малку посилен вкус од белите, па џемот ќе има поинтензивна арома.
Ако планирате да направите поголема количина на џем и да ги зголемите состојките, времето за готвење ќе трае подолго.
По желба, во смоквите може да ставите мелени каранфилчиња и сечкани ореви или бадеми.
Ако немате многу време за подготовка, а ги обожавате домашните џемови и мармалади, имаме супер идеја за вас! Витаминка имаат превкусни мармалади кои ги обожаваме. Во нивната палета може да најдете мармалад од јагоди, цреша, кајсија, праска и портокал. Немаат конзерванси, а вкусот им е фантастичен!