Летото е совршено за брзи и здрави рецепти! А овој период никој нема да може да одолее на интегралните брускети со печен зеленчук. Крцкави, со сос од павлака и печени тиквички, модар патлиџан и домати.
Звучи примамливо, зарем не? За да ја зголемиме хранливата вредност зеленчукот го приготвивме со маслиново масло и додадовме микс од четири семиња (лен, сусам, тиква и сончоглед). Задоволни од вкусот, сакавме она што е добро да го споделиме со сите вас. Пробајте ги, нема да се каете!
Состојки:
- ½ модар патлиџан
- ½ тиквичка
- 1 домат
- маслиново масло
- 3 парчиња интегрален леб
- 2 лажици павлака
- лук во прав
- микс од четири семиња (лен, сусам, тиква, сончоглед)
- сол и мелен црн пипер по вкус
- свеж босилек.
Подготовка:
- Во мал сад ставете 3 лажици маслиново масло, посолете и зачинете со мелен црн пипер и лук во прав.
- Парчињата леб премачкајте ги со зачинетото масло и наредете ги во тава. Печете ги во загреана рерна на температура од 250 степени за време од 8 до 10 минути, додека поруменат.
- Модриот патлиџан и тиквичката измијте ги и исечете ги на тенки кругови. Посолете ги и оставете ги 10-тина минути. Потоа исцедете ги.
- Скарата или грил тавата премачкајте ја со маслиново масло. Ставете ги сечканите тиквички, модри патлиџани и домати да се печат. Печете ги 3 минути од едната страна, а потоа свртете ги и продолжете со печењето уште 2 до 3 минути.
- Во мал сад ставете ја павлаката и зачинете ја со лук во прав, сол и мелен црн пипер. Сосот убаво измешајте го со лажица.
- Печените лепчиња премачкајте ги со подготвениот сос од павлака и наредете печен модар патлиџан, тиквички, домати. На крај, врз брускетите ставете микс од семиња и свеж босилек. Уживајте во здравиот појадок или мезе!
Ви препорачуваме да прочитате: Брускети со намаз од авокадо.