Лесен рецепт за домашен сок од портокали • Сè за храна

„Се дружиме, споделуваме рецепти и ги испробуваме. Групата Се за храна на Facebook е кулинарско катче кое е моја инспирација за најубавите, домашни рецепти. Идејата за овој рецепт за домашен сок од портокали е токму од таа група. Го сподели Сим Атанасовска, а мене многу ми се допадна и решив да го испробам веднаш.

Вкусот потсетува на купечките сокови, но како што имаше напишано Сим, има мала количина на горчина која доаѓа од кората. Јас ја намалив и количината на шеќер, ставив 500 г, но може да додадете по желба. Изладен со коцки мраз би бил супер освежување за топлите денови!“ – вели Марија од нашиот тим.

Состојки:

750 + 500 г портокали
1 лажица сода бикарбона
5 г лимонтус
6 л вода
500 – 900 г шеќер (по вкус).

Подготовка:

Во длабок сад ставете 750 г портокали. Додајте вода за да ги покрие и 1 лажица сода бикарбона. Оставете ги да отстојат 1-2 часа.
Потоа, исцедете ги, убаво измијте ги и ставете ги во длабок сад. Прелијте ги со чиста ладна вода (количината на вода да ги покрива портокалите) и оставете ги да стојат преку ноќ.
Портокалите исечкајте ги на помали парчиња. Во сад ставете 1 л вода да зоврие и додајте ги исечканите портокали, шеќерот и лимонтусот. Оставете ги да варат 30 минути.
Исцедете го сокот од преостанатите 500 г портокали и ставете го во посебен сад.
Со рачен блендер, изблендирајте ги варените портокали. Добиената каша исцедете ја со цедалка, ставете ја во посебен сад и додајте го сокот од портокалите. Во садот додајте ја и преостанатата количина на вода и измешајте.
Сокот од портокал ставете го во чаши по желба и послужете го. На здравје!