Маркиза торта • Сè за храна

Велат дека старинските рецепти се најубави. Тоа можеме да го потврдиме баш со оваа чоколадна маркиза торта. Чоколадо и ореви споени во вкусна торта! Приготвена со голема љубов од Гордана, член во групата Сѐ за храна.

Поразговараме со Гордана за оваа торта и таа ни кажа дека рецептот е многу стар, а тортата немала име. Ја нарекла маркиза торта поради тоа што изгледа богато.

Состојки:

За пандишпан:

6 белки
12 лажици шеќер
12 лажици мелени ореви
2 лажици брашно.

*Се прават 3 три кори.

Фил 1:

18 жолчки
6 лажици шеќер
100 г чоколадо за готвење.

Фил 2:

300 г мелени ореви
100 мл млеко
300 г шеќер во прав
250 г маргарин или путер по желба.

За декорација:

500 г маргарин или путер
500 г шеќер во прав
300 г чоколадо.

Подготовка:

Во длабок сад за матење ставете 6 белки и изматете ги да се добие цврст шлаг. Во текот на матењето додавајте го шеќерот.
Оревите измешајте ги со брашното и додајте ги во изматените белки. Измешајте со лажица и смесата ставете во кружен калап (бр.28) обложен со хартија за печење.
Печете во загреана рерна на 200 степени за време од 10-15 минути.
Постапката повторете ја и испечете уште 2 кори, што значи дека ви требаат 18 белки за подготовка на тортата.
Во меѓувреме подгответе го филот. Жолчките изматете ги со шеќерот. Штом шеќерот се растопи садот ставете го на пареа и варете го додека смесата се згусти. На крај додајте го чоколадото и измешајте за да се растопи. Филот оставете го да се излади.
Започнете со подготовка на вториот фил. Млекото ставете го во сад да се вари. Со врелото млеко попарете ги оревите, а потоа додајте 300 г шеќер во прав. Измешајте и оставете филот да се излади.
Маргаринот пенесто изматете го, а потоа поделете го на два дела и додајте го во изладените филови. Филовите изматете ги со миксер.
Врз првата кора ставете половина од филот со оревите, а потоа додајте половина од филот со жолчките и чоколадото. Врз нив ставете ја втората кора и додајте го преостанатиот фил со ореви, па со жолчки и чоколадо. На крај ставете ја третата кора.
Маргаринот изматете го со шеќерот во прав. Потоа додајте 300 г растопено чоколадо. Со филот премачкајте ја тортата и декорирајте по желба. Послужете ја со омиленото кафе. На здравје!