Кога сакаме топло вкусно печиво, па и вака со вкусно изненадување внатре, овие мексикански банички со фил од мелено месо и тоа како би ни овозможиле дегустативна сатисфакција!
Интересно изгледаат, а и не се тешки за правење. Многу е добро што може да ги понесете со себе и да ги уживате на разни места, подалеку од домот и трпезата. Еве го рецептот!
Состојки:
За тесто:
- 400 гр брашно
- 1 јајце
- 200 мл млако млеко
- 1 сув квасец (7-10гр)
- 1 рамна лажичка шеќер
- 1 лажичка сол
- 70 гр путер или маргарин
За фил:
- 1 главица кромид
- 350 гр мелено месо
- 250 мл доматно пире
- 50 гр пченка
- 1 лажичка црвен мелен пипер, оригано, вегета, црн пипер
- 4-5 лажици масло.
Подготовка:
- Во садот за мешање соединете половина од брашното, шеќерот, солта и квасецот.
- Потоа додадете ги млакото млеко и растопениот или омекнат путер.
- Почнете да месите со постепено додавање на останатото брашно, додека тестото не почне да се одвојува од прстите, а потоа оставете го да нарасне до двојна големина.
- Кромидот ситно исечкајте го и пропржете го кратко во масло, а потоа додадете го и меленото месо (може да ги пржите и заедно).
- Кога добро ќе се пропржи месото, додадете го доматното пире и зачините.
- Кога ќе испари вишокот течност додадете ја и пченката. По желба може и да ја изоставите.
- Нараснатото тесто расучете го така да биде со дебелина од околу половина сантиметар, а потоа со поголема чаша вадете кругови (убаво излегуваат кога дијаметарот е околу 8см).
- На секој од круговите ставете по една лажичка фил во средината.
- Краевите превиткајте ги, убаво залепете ги, а потоа наредете ги во претходно намрсен плех или обложен со пекарска хартија и тоа со составуваниот дел од долната страна.
- Одозгора премачкајте ги со јајце и посипете ги со сусам.
- Печете во загреана рерна на 200 степени додека поруменат.
На здравје!
Рецептот го испратил: Клара Бос.
Ви препорачуваме да прочитате: Мексиканско тако со домашни тортиљи.