Мириса на есен, на убави есенски ароми, јаболко, цимет и кафеав шеќер! Секое годишно време си има своја магија, свои сезонски овошки и уште поубави рецепти. А симбол на есента се нашите убави јаболка, вкусни и сочни. Да ги искористиме и направиме палачинки со фил од јаболка, цимет, кафеав шеќер и портокал!
Веќе ве привлече рецептов? Нас исто така. И благодариме на Невена за убавата идеја, а рецептот со големо задоволство го споделуваме со сите.
Состојки:
- 500 мл млеко
- 3 јајца
- 350 гр брашно
- 2 лажици шеќер
- 1 ќесичка ванилин шеќер
- 50 гр стопен и оладен путер
- изрендана кора од портокал.
Фил:
- 1 кг јаболка
- 120 гр кафеав шеќер
- 100 гр суво грозје
- 2 лажици пињоли (може и без нив)
- 60 гр путер
- исцеден сок од пола портокал
- ½ лажиче цимет.
Прелив – декорација:
- 1 полна лажица чоколаден крем
- 3 лажици млеко.
Подготовка:
- Најпрво подгответе ја смесата за палачинки
- Во сад ставете сите состојки и со миксер изматете ги додека се добие хомогена смеса. Садот покријте го со најлонска фолија и оставете го во фрижидер.
- Додека смесата за палачинките стои во фрижидер подгответе го филот од јаболка. Сувото грозје ставете го во вода малку да омекне. Јаболката излупете ги и исечете ги на четвртинки. Секоја четвртинка исечете ја на листови дебели по 4-5 мм. Јаболката ставете ги во ладна вода во која сте додале исцеден сок од лимон за да не потемнат.
- Во тава на оган, на умерена температура ставете ги путерот и шеќерот. Мешајте додека се стопат. Во тавата додајте ги јаболката и измешајте. Потоа додајте ги сувото грозје, пињолите, сокот од портокал, циметот и едно мало филџанче вода. Оставете ги да се динстаат додека течноста испари и јаболката омекнат. Повремено нежно мешајте ги за да останат цели, да не се направат како каша.
- Кога е готов филот, тенџерето тргнете ја на страна.
- На загреаната рингла, ставете тава за палачинки да се загрее. Во тавата со помош на поголема лажица ставете од смесата и испечете ги палачинките. Од оваа смеса јас направив 10 палачинки.
- Земете една палачинка и на едната половина ставете по 1-2 лажица од филот и поклопете ја. Ставите уште 1 лажица пак на половина и поклопете ја како триаголник. Или едноставно, на секоја палачинка на крајот нанесете од филот и завиткајте ја во ролна. И така додека ги потрошите.
- На тивок оган ставете го чоколадниот крем и млекото. Растопете ги и попрскајте ги палачинките. На здравје!
Рецептот го испратил: Невена Ѓероска.
Ви предлагаме да прочитате: Чоколадни палачинки со рум и цимет.