Ако сте љубител на пилешко месо, имаме одличен рецепт за вас, пилешки прсти похувани во смеса од брашно и пиво! Одлични се за мезење со друштво. Имаат лесна подготовка, па не мора да поминувате многу време во кујната. Направете го и поканете ги пријателите да го следите фудбалскиот натпревар и да навивате за вашата омилена репрезентација!
„Ова е мојот омилен рецепт за пилешки прсти. Се прави смеса со брашно, јајца и пиво, а потоа истите се пржат. Пилешките прсти се меки и другиот ден, а може и да се замрзнат. Рецептов е предобар!„ – вели Марија.
Состојки:
- 500 г пилешки стек
- 150 г брашно
- 2 јајца
- 250 мл пиво
- сол, мелен црн пипер, мешан зачин по желба или кари зачин.
Подготовка:
- Во поголем сад ставете ги јајцата и изматете ги со помош на виљушка. Додајте ги пивото и брашното. Посолете по вкус и убаво измешајте. Оставете смесата да отстои додека го подготвувате пилешкото месо.
- Пилешкиот стек исечете го на ленти. Лентите месо посолете ги и зачинете ги со сол, мелен црн пипер, мешан зачин или кари по вкус.
- Подготвените ленти месо потопете ги во смесата со пиво и измешајте. Ако смесата е многу течна, додајте брашно. Треба да добиете смеса околу месото со густина како смесата за палачинки. Пилешките прсти пржете ги во поголема количина на претходно загреано масло.
- Кога месото ќе добие златно кафеава боја извадете го од тавата и ставете го во сад обложен со хартија.
- Похуваното пилешко месо послужете го топло во комбинација со чаша ладно пиво. На здравје!
Совети плус:
- Од наведените состојки ќе добиете поголема количина на пилешки прсти. По желба може да ги намалите состојки.
- Ако ти се допадна видео рецептот, разгледај ги моите профили и заследи ме:
- Instagram – @kocovska.marija
- Facebook – Marija Kocovska
- Youtube – Marija Kocovska
- Tik Tok – @marija.kochovska.
Автор на рецепт: Марија Кочовска.
Ви препорачуваме да прочитате: Гурмански специјалитет – пилешко Киев.