Мека како душа, со превкусен фил од тиквички и сирење! Баш вака може да се опише убавата погача со фил од тиквички и сирење, која ја приготви Невена.
Таа вели: „Преубаво, меко, полнато лепче погодно за доручек или вечера со чаша јогурт“. Состојките кои ви се потребни за подготовка на оваа погача се едноставни и најверојатно ги имате во кујната.
Состојки:
- 250 мл топла вода
- 100 мл масло
- ½ коцка квасец
- 1 лажиче сол
- ½ лажиче шеќер
- 500-600 гр брашно.
За фил:
- 1 средна (450 гр) тиквичка
- 250 гр изварка (урда)
- 2 мали јајца
- прстофат суво нане
- по вкус сол и црн пипер
- путер по потреба.
Подготовка:
- Пред да го замесите тестото, тиквичката изрендајте ја, ставете ја во цедалка, посолете ја и оставете ја да стои и испушти водата.
- Замесете го тестото.
- Во сад за месење ставете го маслото, јајцето, солта, шеќерот, изронатиот квасец, водата и со постепено додавање на брашното замесете изедначено и меко тесто. Покриено оставете го да одмори, додека да нарасне за време од 20 минути.
- Додека тестото нараснува подгответе го филот.
- Ренданата тиквичка убаво исцедете ја од водата и ставете ја во чинија. Јајцата изматете ги со виљушка. Одвојте малку од матените јајца, за подоцна да ги искористите за премачкување на погачата.
- Во садот со матените јајца додајте ги тиквичката, сирењето, нането, сол и црн пипер по вкус и измешајте.
- Тестото поделете го на 15 топчиња. Од секое топче расукајте мала коричка, на средината ставете по 2 лажици од филот и со странично собирање и притискање на прстите убаво затворете го.
- Топчињата ставајте ги во намачкана тава со масло бр 28. Кога сите се готови премачкајте ги со јајцето, посипете со сусам и наредете неколку парченца путер.
- Вклучете ја рерната да се загрева на 190 степени, а за тоа време погачата ќе нарасне.
- Ставете ја да се печи во загреаната рерна за време од 40 минути или времето одредете го спрема вашата рерна. Печената погача со фил од тиквички и сирење извадете ја од рерната и покријте ја со кујнска крпа. Оставете ја кратко да се излади, а потоа послужете ја. На здравје!
Рецептот го испратил: Невена Ѓероска.
Ви предлагаме да прочитате: Декоративна погача со сирење и спанаќ.