посна руска салата

Посна руска салата

Голем број на семејни свечености, куќни слави, имендени, родендени се слават во време на пости, за што домаќините подготвуваат посни богати трпези. Секоја трпеза ја красат различни посни јадења, салати и десерти.

Токму за ваквите прилики ви предлагаме домашен рецепт за посна руска салата која сигурно ќе ви се допадне и вас, а на многумина ќе им се најде за време на различни свечености. Дегустирајте ја оваа посна руска салата и збогатете ја трпезата.

посна руска салата

Состојки:

  • 400 грама компири
  • 400 грама моркови
  • 200 грама маринирани шампињони
  • ½ мала конзерва грашок
  • 200 гр посен кашкавал од растително потекло по желба
  • 6 кисели краставички
  • 300 мл посен мајонез.

Подготовка:

  1. Компирите измијте ги, излупете ги и ставете ги да се варат. Техниката за најдобро варење на компири за салата прочитајте ја тука.
  2. Морковите измијте ги, добро исчеткајте ги или излупете ги и ставете ги во тенџере на оган со вода да се варат. За побрзо да се сварат, морковите исечкајте ги на ленти.
  3. Грашокот ставете го во цедалка за да се исцеди.
  4. Варените компири и моркови исечкајте ги на мали коцки и ставете ги во длабок сад. Кашкавалот, печурките, краставичките исечкајте ги на мали коцки и додајте ги во садот со компири.
  5. Состојките посолете ги по вкус и убаво измешајте ги.
  6. Потоа, во садот ставете неколку лажици од мајонезот, измешајте и оставете ја салатата да отстои во фрижидер за време од 20 минути.
  7. Пред сервирање, додајте го остатокот од мајонезот, измешајте и по желба премачкајте ја салата. Декорирајте ја по желба.

Целта на двократното ставање на мајонезот е поради тоа што компирот ќе го впие мајонезот и ја менува сочноста на салатата, односно ќе биде посува. Затоа се додава пред самото сервирање со што се добива покремаста посна руска салата. Ова е доза прилагодена за слави и други домашни прослави, а по желба може да ја намалите или зголемите дозата во зависност од намената.

Рецептот го испратил: Даниела Џогова

Сподели: