Рај за очите, убавина во чиниите! Токму вака може да се опиши нашата посна солена торта со спанаќ. Ја приготвивме за именден во време на пости, а сите кои ја пробаа го побараа рецептот.
Лесна е за подготовка и секој може да ја направи. Идејата за рецептот ја добивме од нашата пријателка Елена, но направивме некои модификации, па ја споделуваме нашата верзија. Посна и вегетаријанска, одлична за сечиј вкус! Пробајте ја, па напишете ни како ви се допаднал овој рецепт од кујната на Сѐ за храна.
Состојки:
- 100 мл пиво
- 100 мл масло
- 100 мл газирана вода
- 20 рамни лажици брашно
- 1 ќесичка прашок за печиво
- ½ мала лажичка хималајска сол или по вкус
- ¼ мала лажичка куркума
- 200 до 250 грама спанаќ.
За фил:
- ½ чаша ориз
- 2-3 лажици посен мајонез
- 3-4 кисели краставички
- 150 грама маринирани печурки или посен кашкавал по избор
- сол по вкус
- 2 лажици посен мајонез за премачкување
- 30 грама потпечен сусам за декорација.
Подготовка:
- Спанаќот исчистете го, измијте го и исечете го на ленти со ширина од околу 1 см. Во тенџере на оган ставете вода и додајте го спанаќот. Штом спанаќот омекни, тенџерето тргнете го од огнот. Потоа, спанаќот исцедете го.
- Во длабок сад стававте ги пивото, маслото и газираната вода. Измешајте ги состојките со лажица. Брашното, солта, куркумата и прашокот за печиво ставете ги во друг сад. Измешајте ги со лажица и додајте повеќе од половината во садот со маслото. Измешајте ги состојките.
- Во садот додајте го спанаќот и измешајте. Потоа, додајте го преостанатото брашно.
- Во голем плех ставете хартија за печење. Турете ја смесата и добро израмнете ја. Плехот ставете го да се пече во загреана рерна на 220 степени. Печете за време од 10 до 15 минути.
- Кога тестото ќе биде печено, извадете ја тавата од рерна и оставате ја да се излади.
- Во меѓувреме пригответе го филот.
- Во тенџере на оган ставете 1 ½ чаша вода и додајте го оризот. Варете го оризот за време од 10 од 15 минути, додека оризот омекне. Во тенџерето со оризот додајте ладна вода, а потоа добро исцедете го.
- Ставете го во длабок сад.
- Киселите краставички и печурките исечете ги на мали коцки. Потоа додајте ги во садот со оризот. Измешајте и додајте го мајонезот. Количината на мајонез е мала, а доколку сакате покремаст вкус, може да додадете повеќе мајонез по желба. Посолете по вкус. Филот поделете го на два еднакви делови.
- Изладеното тесто исечете го на три ленти.
- Врз првата лента ставете половина од филот. Потоа, ставете ја втората кора. Врз неа нанесете го преостанатиот фил и добро израмнете. Ставете ја третата кора. Од горната страна премачкајте ја со посен мајонез и посипете со потпечен сусам.
- Тортата оставете ја најмалку еден час, а потоа исечете ја на коцки или парчиња по желба. Готовата посна солена торта со спанаќ послужете ја. На здравје!
Ви предлагаме да прочитате: Посен солен куглоф за слави.