За љубителите на палачинки и печурки им предлагаме интересен рецепт за похувани посни пирошки, кои ни ги испрати Невена. Овие посни пирошки се идеални за време на пости и одлично се вклопуваат на секоја трпеза.
Рецептот нуди можност да бидете креативни и да направете фил по ваша желба. Едноставно додајте маслинки, кисели краставички, а доколку не постите ви предлагаме да ги пробате со фил од мелено месо, кромид и доматно пире.
Состојки:
- 1 л вода
- 500 -600 гр брашно
- 5 лажици масло
- 1 мала лажичка сол
- 500 гр шампињони
- 2 средни компири
- 2 чешниња ситно сечкан лук
- 5-6 лажици пире од домати
- 3-4 гранчиња ситно сечкан магдонос
- 1 мала лажичка мешан сув зачин
- по вкус сол и црн пипер
- 1 мала лажичка оригано
- по потреба млеко од соја
- по потреба лебни трошки
Подготовка:
- Водата, брашното, маслото и солта ставете ги во сад за матење. Изматете ги со миксер за да се добие хомогена смеса. Од добиената смеса испечете палачинки, покријте ги со кујнска крпа и оставете ги да изладат.
- Компирите излупете ги, исечете ги на мали коцки и ставете ги во помал сад со вода да се варат. Варените компири исцедете ги од водата и испасирајте ги како пире.
- Печурките исчистете ги, измијте ги и изрендајте ги на ливчина (на страната од рендето за рендање зелка). Ставете ги да се пржат во тава со масло. Посолете ги, зачинете по вкус и додајате црн пипер, лук и магдонос. Оставете печурките да се динстаат додека течноста испари. Потоа тргнете ги на страна и оставете ги да изладат.
- Во изладените печурки додајте го пирето од компири, пирето од домати, ориганото и измешајте за да се изедначи смесата.
- На секоја палачинка на долната страна ставајте по две до три лажици од филот, свиткајте ја од станите, а потоа завикајте ја во ролничка. На крајот прицврстете ја со чепкалка.
- Од кога ќе ги свиткате сите палачинки извалајте ги прво во млекото од соја, а потоа во лебните трошки.
- Пирошките пржете ги во загреано масло од двете страни, а потоа извадете ги на кујнска хартија. Приговените посни пирошки може да ги послужите како предјадење или како комлетен оброк со салата и посен мајонез.
Рецептот го испратил: Невена Ѓероска